2248/2025-2026

KOLASIB, November 17, 2025: Vawiin khan Kolasib District Development Coordination and Monitoring Committee (DISHA) meeting chu DC Conference Hall, Kolasib-ah neih a ni a. Pu Richard Vanlalhmangaiha, MP (Lok Sabha) leh DISHA Committee Chairman ni bawk chuan he thutkhawmna hi a kaihruai a ni.

Thutkhawmna ah hian Pu Richard Vanlalhmangaiha chuan thu sawiin, vawiina Department hrang hrang aiawhte thahnem tak an kalkhawm thei chu lawmawm a tih thu a sawi a. Mizoram-in MP pakhat chauh a neih avang leh District 11 a awm si avangin, DISHA danin quarter tina meeting neih tura a tih chu a dan ang thlap a kalpui a harsat thu a sawi lang bawk. Kolasib District-in meeting atana an inbuatsaihna tha a tih thu sawiin, vawiina kalkhawmte chu an hun hmang tangkaia, zawhna leh sawi duh nei pawhin inthlahrung lova sawi turin a chah bawk.

MP chuan kawngpui thawmthat chungchang sawi langin, NHIDCL aiawh lo kalte hnenah an kawng siam hna chu chak zawka thawk turin a hrilh a. NH-306 leh NH-06 te chu Mizoram "chak lakna ber" a nih hria a, tun aia chak zawk a thawk turin leh an hun tiam chhunga zo turin a hrilh.

DISHA hi District Development Coordination and Monitoring Committee a ni a, India Sorkar laipui-in District tina a din a ni. A tum ber chu Sorkar Laipui scheme hrang hrang (Centrally Sponsored Schemes) te a taka kalpui a nih dan uluk taka endik (monitor) leh thawhhona tha (coordination) a awm theih nana hma lakna a ni. He committee-ah hian MP te hi Chairman niin, hmasawnna hnathawh mek Department ten an kalpui dan te leh harsatna awm te sut kian dan an ngaihtuah ho thin a ni.

DISHA ahhian Department Pawimawh tak tak telin, chung zinga thenkhatte chu Rural Development (MGNREGS, PMAY-Gramin, etc.),Public Works Department (PWD) / NHIDCL(Kawngpui siam, PMGSY, etc.), Public Health Engineering (PHE) (Jal Jeevan Mission, tui thianghlim in tur), Health & Family Welfare (National Health Mission), School Education (Samagra Shiksha Abhiyan), Social Welfare (Anganwadi, Pension scheme te), Agriculture & Allied Departments te leh Department dangte an tel a ni.

Vawiin meeting-ah hian Kolasiba sorkar Department hrang hrang aiawhte kalkhawmin, an Department hmalakna  te an tarlang a. He hunah hian MP hi Pu Lalfamkima, Deputy Speaker, Mizoram Legislative Assembly leh Pu Robert C Lalhmangaiha, Kolasib DC leh DISHA Member Secretary ni bawk ten an tawiawm a ni.