1449/2024-2025

Kolasib Dated the 5th August, 2024: Vawiin khan Kolasib District Co-ordination Committee on National Deworming Day chu Kolasib Senior Chief Medical Officer Dr. RK Lalthlamuana hovin a office chamber-ah an ṭhukhawm a, National Deworming Day (NDD) Second Round 2024 kalpui dan tur sawiho a ni.

Kolasib Senior CMO Dr. RK Lalthlamuana chuan rulhut vangin pumna leh thihna hial te pawh a thlen theih avangin rulhut hlo ei chu a pawimawh hle a ni, a ti a. Rulhut vanga hrisel lohna chi hrang hrang ven nana rulhut hlo ineitir nan te, kut sil fai leh chaw ṭha pawimawhna inzirtir nan te NDD chu hman ṭhin a nih thu sawiin, NDD hlawhtlin nana theih tawpa thawhpuitu Education department leh ICDS te chungah lawmthu a sawi.

National Deworming Day hi kum tin vawi hnih, February thla leh August thlaah te hman ṭhin a ni a. Kumin National Deworming Day Second Round hi August ni 9, 2024 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tur a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi Anganwadi Centre, Schools leh College kallai te pek leh tura ruahman niin, chumia hmaihte chu an ina kal chilha pek leh turin ruahman a ni.

Kumin NDD Second Round-a rulhut hlo pek tur atan hian Kolasib District chhungah kum 1 leh kum 19 inkar target 31500 an awm a. NDD Second Round bul ṭanna leh hawnna hun hi August ni 9, 2024-ah Tumpui Middle School, Kolasib-ah hman tum a ni a. Hemi ni hian District chhunga school, college leh anganwadi centre-ah te rulhut hlo inpek a nih dawn bakah, sikul kal lote chu ASHA te'n an inah kal chilhin an pe ang a. Target zinga tel si, hemi nia pek hman lohte tan August ni 16-ah Mop Up buatsaih a ni leh dawn bawk a ni.

Kumin February, 2024 first round-ah khan Kolasib District chhunga target mi 31176 aṭangin mi 30665 chu rulhut hlo pek niin, hei hi 98.36% a ni.