Childline India India Foundation  (CIF) hmalakna in vawiin khan Kolasib DC Conference hall ah Member pahnih Lena Basu leh Arunangshu Mondal te chuan Integrated Child Protection Scheme hnuaia an hmalak tum dan tlangpui sawi fiahna hun an hmang.

Member te hian an thil tum ber chu Kolasib District a Childline Service siam a nih thu tarlangin kum tlinglo naupang (kum 18 hnuai lam) heng fahrah, ruihhlo ngai, chenna tur neilo, dan bawhchhia, naupang hna thawhtir (child labour), naupang rukbo, naupang khuaikhem tawk, HIV vei, rilru lama rual banlo, naupang in atanga tlan bo emaw nu/pa te ina naupang an kalsan te zawn chhuah/chhanchhuah leh chhawmdawl chu he Project ina a thil tum ber a nih thu an sawi. Childline India India Foundation chuan District a Shelter Home, CDPO bakah NGO te thawhpuina in heng naupang tanpui ngaite  hi an chhanchhuakin an chhawmdawl dawn a, chumi a tan chuan National Helpline 1098 (24*7 service) a awm a, naupang tanpui ngaite hmu emaw hria emaw chuan hemi number hi an dial anga, Call Centre atangin a call tu State leh District te hriat theih ani anga, a Call tu District a chhanchhuaktu team te chu hriattir an ni anga, naupang chu Child Welfare Committee in a chhawmdawl dan tur an rel sak dawn a ni.

He Project hnuai ah hian Childline Advisory Board chu District Bawrhsap Chairman na hnuai ah din tur a ni a, Social Welfare Department a thawkte leh NGO te chu a tul dana zirin member tura ruat an ni ang. He programme hnuai ah hian District a Naupangte enkawl na hmun awmsa chu endik/enkual an ni anga, Naupang humhim leh enkawl chungchanga dan leh hrai bakah dan tesep awm te chu home enkawltu ten an hrechiang em tih bakah an hriatchian loh chuan awareness te an neihpui anga, Naupang enkawl hmun/home (Organisation) chuan kum 3 chhung Audit Accounts a nei tur anih bakah Naupang kaihhnawih a enkawlna leh ham thatna te bakah a chhawmdawlna tur kawnga programme leh Policy te an nei tha em tih te an endik anga, heng hmun/home hrang hrang te hi an zirchian hnuah Sawrkar laipui ah a report thawnin District a naupang enkawl na tura tha ber tura ngaih hmun/home chuan Kum 1 ah  tanpuina Cheng Nuai 14 Sawrkar laipui atangin a dawng thin dawn a ni.

Childline India India Foundation hi Integrated Child Protection Scheme, Union Ministry of Women and Child Development hnuaia Quasi- Government Body anga din ani a, tun dinhmunah Childline Service chu India rama District 450 chuang ah kalpui tawh ani a, hmarchhak bialah District 35 chuanga kalpui mek niin, Mizoram ah chuan Aizawl leh mamit District a kalpui tawh niin, kum 2019 hian Sawrkar laipui chuan Kolasib leh Lunglei District te a rawn thlang a ni.