1653/2024-2025

Dated Kolasib the 19th August, 2024: Vawiin tlai khan Kolasib DC Conference Hall ah Kolasib DC, Pu Robert C. Lalhmangaiha kaihhruainain NH 306 & 06 Sairang leh Vairengte, Kolasib District chhung bika  tun hnaia kawng chhe lutuk avanga mipuite harsatna tawh dan leh chak zawka thawm that dan tur chungchang ngaihtuah ho a ni.

Meeting kaihruaitu Pu Robert C. Lalhmangaiha Kolasib DC/DM chuan vawiina an meeting chu pawimawh tak, zirlai naupangte zirna leh Mizoram nghawng thei chungchang sawiho tur an nih avangin uluk taka an ngaihtuahna te hmang turin kalkhawmte chu a sawm a. Ruahtui tlak chhung chu October hawl pha tura ngaih a nih avangin engtinnge hemi hun chhung hian mipuite harsatna kan chhawk zangkhai ang tih hi kan ngaih pawimawh hmasak tur a ni, a ti.

DC chuan  Kâwnpui leh Bualpui khaw zirlai nu leh pa aiawh kalkhawmte hnenah chuan an faten school an tlai thin chu pawi a tih thu sawiin, school tan hun diktaka tan a, an let leh lamah pawh an in theuha hun taka an thlen theih nan theihtawp a a hma an lak tur thu a hrilh a. He meeting-a tel ve lirthei neitu Joint Committee pawh an Press Release siam tak chungchang ah mipuite a nghawng tur ngaihtuah a, an thu tih tluk tawhte ngaihtuah tha leh turin a ngen bawk a ni.

Thutkhawmnaah hian kawng chhia chungchang a hmalak dan tur ngawrh taka sawiho a ni a. A bik takin RTP Sethawn leh Kawnpui /Bualpui quarry inkâr, kawng chhiat avanga lîrthei tangkhang rei thei lutukte tih ziaawm theih dan tur sawiho a ni. Hemi chungchangah hian kalkhawmte leh NHDCIL contractors te atanga ngaihdan hrang hrang ngaihthlak a nih hnuin a khuar zual lai hun tiam chhunga hnawh te, zirlai naupangten zirna in a hun taka an thlen theih nan zing lam School kal hun leh tlai ban hun chhung a motor lian (HMV) tlân phal loh hun siamte rel a ni. Traffic movement felfai tak a awm theih nan Sethawn leh Kawnpui/Bualpui Quarry inkarah hian zan lamah SP Office lamin traffic duty an dah anga, chhun lamah NHIDCL Contractors mi rawih ten an vil ve thung dawn bawk a ni. Kawng dinhmun chungchang en thlithlai leh review nei thin tur a Working Committee din rel a ni bawk.

Vawiin thutkhawmna ah hian DC office-a officers te, SP Kolasib leh a thawhpui police hotute, NHIDCL hotute, Kawnpui SDO (C), MPWD Sr. EE (NH), contractors te, Kâwnpui leh Bualpui school naupang nu leh pa aiawhte, Kawnpui, Bualpui leh Thingdawl VC members te leh lirthei neitu Joint Committee hruaitute an tel a ni.