1193/2026-2027

Kolasib, 25th June, 2026: Vawiin chawhma dar 11:00 khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Kolasib District chhunga PM Vishwakarma Scheme kalpui dan tur chungchangah thutkhawm pawimawh neih a ni.

Thutkhawm kaihruaitu Kolasib Bawrhsap Pu H. Dolianbuaia chuan thu sawiin, kuthnathawktute leh kutchhuak thiamthil neite tan an kutchhuakte hralh chhuahna (marketing) kawng dap thiam a pawimawh hle a, chumi tur chuan training tha tak neih a ngai a ni, a ti. Hlawhtling tur chuan thawhrim a ngaih thu leh thiamna thar inzir chhoh zel a pawimawh thu a sawi a. Theihtawp chhuaha hma la tur leh an hmalaknate pawh DC office lamah rawn hriattir ve thin turin kalkhawmte chu a chah a ni. Hei bakah hian, he scheme hnuaia hamthatna awmte mipuiin an theihna zawn theuha an chhawr tangkai theih nan bank hotute hnenah pawh loan pek chhuah leh thehdarh kawngah nasa zawka hmasawn tum turin a ngen bawk.

He meeting-ah hian PM Vishwakarma Scheme hlawhtling taka kalpui a nih theih nan thil pawimawh hrang hrang ngaihtuah ho a ni a. Heng zingah hian PM Vishwakarma Udyami Mitra Portal-a inziahluh (onboarding) la ti ve lote inziahluh tir chungchang te, school leh community hall hmanga training centre tur zawn belh leh dil belh chungchang te rel a ni. District Administration kaltlanga tualchhung kuthnathawktu (local artisans) te zawn chhuah leh khawm (mobilisation) chungchang te pawh sawiho a ni bawk.

Hemi bakah hian PM Vishwakarma artisans-te thil siam chhuahte online hmanga tha zawka an hralh theihna tura Amazon Karigar platform-a inziahluh (onboard) tir dan tur te leh, hmalakna kawnga harsatna awmte State level-a thlen chhoh zung zung dan turte pawh thlirhovin hmalak zui dan turte an rel ho a ni.

Vawiin thutkhawmah hian Project Director (DRDO), DIPRO, DCIO, Principal (ETC, SIRD Kolasib), District Manager (CSC, Kolasib District), Kolasib Town Area chhunga Bank Manager hrang hrangte bakah Nisapui, North Chaltlang, Hortoki leh North Chawnpui Village Council atangin President leh Secretary te an tel a ni.