2565/2023-2024

2023 Khuangchawi thla ni 31: Mizoram Legislative Assembly Inthlanpui 2023 lo awm tur atana Kolasib District chhunga assembly bial pathum zinga 6-Serlui biala polling station hrang hrang leh bial pathuma hmeichhia chauh duty-na tur pink polling station 10-a inthlan buaipui tura ruat, Presiding Officer (PRO), 1st Polling Officer (PO), 2nd Polling Officer leh 3rd Polling Officer te tana training thawh hnihna chu vawiin khan Government Kolasib College-ah buatsaih a ni a. Government Kolasib College-a postal ballot-a vote thlakna Facilitation Centre buatsaihah polling official training-te hian postal ballot-in vote an thlak chhunzawm nghal.

Polling official-te training leh postal ballot voting facilitation centre hi Kolasib District Election Officer Pu John LT Sanga chuan tlawhin, training leh postal ballot vote thlak a enpui a. Tluang taka training buatsaih chhunzawm a ni leh harsatna awm lova postal ballot vote thlak chhunzawm a ni chu lawmawm a tih thu a sawi a. Polling official-te chu ?ha taka an mawhphurhna hlen chhuak tura chahin, duhsakna a hlan a ni.

He training-ah hian State/District/Assembly Level Master Trainer paruk - Pu Lalremruata Sailo, SDO (Civil) Vairengte; Pi F. Lalnisai, BDO Thingdawl; Pu Henry Malsawmtluanga, BDO Bilkhawthlir; Pu Gilbert Lalhlimpuia, SDC Kolasib; Dr Lalramdintluanga, SDC Kolasib leh Pu Samuel Lalrinawma, Lecturer, DIET Kolasib te'n training hi an pe a. Chawhnu lamah EVM hman dan a taka zir hona buatsaih a ni bawk.

Tuirial bial leh Kolasib biala duty turte tan nimin khan training thawh hnihna hi buatsaih a lo ni tawh a. Vawiin hian Serlui biala duty turte bakah, Tuirial biala pink polling station 3, Kolasib biala pink polling station 4 leh Serlui biala pink polling station 3-a duty turte tan training hi buatsaih a ni.

Kolasib District chhunga assembly bial pathumah polling station 89 awmin, Tuirial bialah polling station 26, Kolasib bialah polling station 29 leh Serlui bialah polling station 34 te a awm a ni.