Mizoram sawrkar Art & Culture Department hnuaia Archives Wing buatsaihin vawiin khan Kolasib DC Conference Hall-ah Record vawn that dan zirtirna neih a ni a. He hunah hian Record vawn that pawimawhna te tih thupuia hmangin Pu F. Lalthanmawia, Archivist in zirtirna a pe a ni.

Addl. DC Kolasib Pu Zairemmawia chuan zirhona hun hi hawng hmasain thu a sawi a. Mimal ang leh sawrkar anga lehkha pawimawh leh thil chhinchhiahna te taima taka vawn that hi Mizoten a nachang kan hriat thar a tul hle a ni, a ti a. Record vawn that hi thil tamtak in en let nan leh thil tangkaia telh tur thil a nih thin avangin Research atan pawh a tul hle a, heti lamah hian Mizote kan than harh a tul a ni, a ti a ni.

Sawrkar Department hrang hranga thawktute hnena training petu Pu F. Lalthanmawia chuan, Sawrkar lehkha Record te hi Dan angin Sawrkar phalna leh hriatpuina tellova tih chhiat chuan kum 5 thleng tan leh Rs. 10,000/- thleng chawi theihna a ni, a ti a. Mizote hi thil vawn that kawngah kan that loh avangin ram dang/ hnam dang mi Research rawn ti tur te pawhin harsatna an tawk fo a ni, a ti a. Sawrkar hnathawkte hi Record vawn thatah kan taimak loh avangin Kohhranin min lehpel a ni, tiin tun atanga bul kan tan nghal a ngai a ni, a ti.

Record vawn that hi Dan hmaah phei chuan Evidence a ni nghal a. Thil thar zir leh hmuhchhuah nana hmanraw pawimawh, Development atana thil tul a ni, tiin thil kal tawh khaikhinna awm lovin thil thar awmze nei a thlen theih loh a ni,.tiin kan tu leh fate tana zir tur Mizoram chanchin hnutchhiah thei turin dah that i ching ang u, Pu Lalthanmawia chuan a ti a ni.

Department aiawh kalkhawm ten sawihona neiin zawhna an zawhte chhan nghal a ni a. Department engpawhin Record vawn that danah hriat duh leh zawh duh an neih chuan rawn theih leh a tul phei chuan kal chilh tura an inhuam reng thu Archivist chuan a sawi a ni.