Vawiin khan Kolasib DC Pu Jitender Yadav, IAS hovin Kolasib DC Conference Hall-ah Republic Day 2014 lawm dan tur relin Republic Day Celebration Committee an thukhawm a. Kumin Republic Day chu Pathianni –ah a tlak avangin a lawmna Ceremonial Function chu zing dar 7: 15 –ah neih nise an ti a ni.

DC Pu Jitender Yadav chuan Republic Day chu India ram pum huap ni bik kan neih ropui tak a nih avangin mipui te phur taka kal tura a duh thu a sawi a. Department head te leh sawrkar hnathawkte phei chu kal vek tura beisei a ni tih a sawi a ni.

Republic day hi Tumpui field ah hmangin zing dar 7:15-ah khuallian DC –in hnam puanzar a pawtpharh ang a, Parade contingent te chibai buk chhangin thuchah a sawi ang. Chawhnu dar 3:00-ah VIP At Home, DC bangle- ah sawm bikte tan neih a ni ang a, kum danga tih thin angin Home hrang hrangah thilpek sem a ni ang. Republic Day lawmna atan hian Basket Ball (Men & Women) leh Cricket ( senior & junior) inelna buatsaih a ni dawn bawk a . Paint Ball Competition pawh neih tura tih niin he hunah hian certificate sem a ni dawn a. Sub Hqrs YMA zaipawl te zai tura sawm nise tiin Committee chuan a rel bawk a. Republic Day lawmna hunah hian mitin te kal theuh turin Committee chuan a sawm a ni.