4452/2025-2026

Kolasib, the 13th February 2026: Vawiin khan DC Conference Hall, Kolasib-ah District Safety Commitee buatsaihin ‘Road Safety Month’ hawnna inkhawm buatsaih a ni a. Pu Lalrinpuia Varte, SP Kolasib in road safety month hi a hawng a ni.

Pu Lalrinpuia Varte, SP Kolasib chuan kalkhawmte lawmthu hrilhin, road safety chu mitin ngaih pawimawh tur a ni, a ti a. Road safety chu motor khalhtute chauh ni lovin, ke a kal mipui (pedestrians) te pawhin kan ngaih pawimawh a tul thu a sawi. SP chuan tunlaiin thalai leh kawng kal thenkhatin mobile phone khawih paha kawng kan kan ching thin chu thil pawi thei leh hlauhawm tak a nih thu sawiin, fimkhur lehzual turin chah a. Road safety in a tum - chetsualna thleng thin tihtlem kawngah sorkar leh mipuite tanrual a, theihtawp kan chhuah tlan a pawimawh a ni, a ti.

Motor khalhtute pawh fimkhur taka lirthei khalh turin a chah a, chak lutuk (over speeding) a tlan lova, a hun leh hmun a zira speed control thiam a tul thu a sawi bawk. SP chuan, "Traffic rule leh dan te hi min phuarrittu ni lovin, kan himna atana duan a ni tih hriain, kan zavaiin thuawih takin zawm theuh ila, chhiatna thleng thin tam tak kan pumpelh thei a ni," a ti.

He hun hi Pu Jerome Lalbiakdika, District Transport Officer, Kolasib chuan a kaihruai a. Programme khar nan Kolasib Bawrhsap Pu Robert C. Lalhmangaiha chuan lawmthu sawina hun a hmang a. Bawrhsap chuan District chhung a road safety kawnga hma latu department hrang hrang leh tlawmngai pawl te inpeknaah lawmthu a sawi a. Road safety chungchang inzirtirna (awareness) chu a tam thei ang bera inhrilh darh a tul thu sawiin, mipuite himna turin thawhhona tha tak nen hma la chhunzawm zel turin kalkhawmte a sawm bawk a ni.

Vawiin hun hmanna ah hian Kolasib District chhunga Head of Office te, Driver Association leh Owner Association hruaitute an tel a ni.