‘ India Danpui chuan a khua leh tui zawng zawngte hi Rorelna Dik min pek a tum a ni,’ Pu R. Romawia, Assembly Speaker chuan a ti.

He thu hi vawiin a Kolasib Diakkawn YMA Hall-a neih, RORELNA DIK Seminar, Ethics Committee Mizoram buatsaihah a sawi a. India rama chengte hi khua leh tui zalen, vannei tak kan ni, a ti. Democracy ram kan ni a, khua leh tuiten kawng tinrengah sawrkar hna kan thawk emaw, thawklo emaw, kan dikna leh chanvo min pek hi a thiltum a ni a. Roreltuten office an luah dawnin thutiam Oath of Secrecy an la a. Chumi ang chuan rorelna dik kengkawh a, hleih nei lo tur te, duhsak bik thil avang leh phuba lak duhna avanga an power hmang sual lo tur an ni a. Constitution –in a tum anga kan chanvo dik kan hmulo a nih chuan mipui ten Court-ah kan thlen thei a ni, Pu R. Romawia chuan a ti.

Speaker chuan, Bible a kan hmuh angin ram hi Lalpa ta a ni a. Mizote hi kum 300 vel Pathianin he ramah hian min awm hawhtir tawh a. Ram luahtu tlaktlai lo kan nih chuan kan hnam hi kan boral ang. Chuvangin mipuite i harh ang u, a tia. Mi rethei tak tak kut hnathawk tura bul tanna tur ram pawh neilo kan tam ta hian ka rilru a tina fo thin tiin Pu R. Romawia chuan mi hausa ten kan luah sen loh ram kan nei ta hi Mizote kan in chhut chian a ngai a ni, a ti a. Israel faten kum 50 dana Jubilee dar vua a mi retheite tana an ram an chhuah/theh thin hi Mizoten kan tih ve tur a ni dawn lo’mni, a ti a ni. Tun hmaa la awm ngailo, tun sawrkar ina politician te, official te leh sawrkar kalphung a tha zawnga khalha thurawn petu tur Ethics Committee a din chu thil lawmawm tak a ni, Speaker chuan a ti bawk a ni.

Seminar hi Pu H. Raltawna IAS (rtd), member Ethics Comtt. in a kaihruai a. Rev. C. Rosiama, Chairman, Ethics Comtt. leh Rev. R. Lalrinsanga, member Ethics Comtt. ten paper presentation an nei a. Pi Catherine Laltanpuii, Ethics Comtt. member in Committee kalphungte a sawi bawk.

Chawhnu lamah sawihona hun hman a ni. Rorelna Dik Seminar-ah hian Kolasib DC Pu Lalfela Sailo bakah Sawrkar hnathawk te, Zirtirtu te leh NGO te an kal tha hle a ni.

Attachment

  • Loading attachment...