4551/2025-2026

Kolasib, 20th February, 2026 : Tukin zing  dar 7:30AM khan Deputy Commissioner Office kawtzawl, Kolasib-ah Mizoram State Day vawi 40-na puala State Day of Prayer a vawithumna hun hman a ni a. Pu Robert C. Lalhmangaiha, District Bawrhsap chuan he hun hi a khaihruai a ni. 

Hun kaihhruaitu Pu Robert C. Lalhmangaiha, District Bawrhsap chuan State Day of Prayer, 2026 hmang tura lo kalkhawm te hnenah lawmthu a sawi a.  Kolasib Kohhran Hruaitu Committee (KKHC) te leh sawrkar hotuten State Day of Prayer hmang tura ngaihtuah an lo sen, a taka  hmuh a ni chu lawmawm hle a ni, a ti a. Thahnemngai taka tawngtai turin mipute a sawm a ni.

Vawiin State Day of Prayer hun hmanna a hian Rev Laldintluanga, Chairman, Kolasib Kohhran Hruaitu Committee (KKHC) leh  Hmarveng Bialtu chuan tawngtaitual na thupui 9 sawihawnna hun a hmang a. Tawngtai thupuite chu:

1.    Kan ram hruaitute Pathian tihna nen dik tak leh fel taka ram an hruai theih nan.

2.    Sawrkar hnathawktuten rinawm tak leh thahnemngai taka Pathian leh kan ram tan hna an thawh theih nan.

3.    Kohhran hrang hrangten inpumkhata Pathian rawng an bawl ho theih nan.

4.    Non-Governmental Organisation (NGO) ten Pathian tihna nen ram leh khawtlang tha duhna tak tak nei chunga hna an thawh theih nan.

5.    Khawtlangah inpumkhatna tha a lo awm zel theih nan.

6.    Hlemhletna a reh theihna tura thuneitute leh mipuiten Pathian tihna tak tak kan neih theih nan.

7.    Sumdawngte leh eizawnna hna hrang hrang thawktuten Pathian rawngbawlna rilru pu chunga hlepna leh hlawkna uchuak um lova ei an zawn theih nan.

8.    Ruihtheih thil zuartute leh ti thinten Pathian chhanchhuahna an chan theih nan.

9.    Kan ramah sualna chi hrang hrang a lo tlawm a, Pathian lalna ram a din chhuah ngei theih nan. 

Tawngtairual thupui te hi hun hnih a thenin tawngtairualna hun hman a ni a. Enna In Boys Home, Kolasib vengthar atangin special item ngaihthlak a ni bawk. 

He hunah hian Kolasib khawpui huamchhunga Kohhran hrang hrang atanga hruaitute leh mipui thahnemtak an kalkhawm a. Captain Lalhruaitluanga, Diakkawn Corps chuan malsawm tawngtaiin he hun hi a khar a ni.