Pi  Niharika Rai, IAS Kolasib DC chuan, ‘Mihringte tana thil hlu ber chu Hriatna leh finna hi a ni,’ a ti. He thu hi vawiina Teachers Day Golden Jubilee lawmna, Kolasib St. John’s Higher Secondary School Auditorium-a neiha a sawi a ni a. Teachers Day lawmnaah hian District chhunga zirtirtute an kal tha hle a ni.

Pu B. Lianthlira, DEO, Kolasib chuan Zirtirtute ni lawmna inkhawm hi a kaihruai a. Pi Niharika Rai chuan, Zirtirtute kaltlang hian hriatna, thiamna leh finna nasa tak kan dawng a. Zirtirtute avangin vawiina kan nihphung hi kan nih theih phah a. Chuvangin zirtirtute kan zah leh kan chawimawi hi kan tihtur dik tak a ni, a ti. Tuna zirlaite pawhin kan zirtirtute hlutna hi hre thar fo ila, anmahni atanga kan zir theih apiang nasa theihtawpin zir ila. Kan ram leh hnam tan mi chhenfakawm ni turin tan i la ang u, a ti a ni.

He hunah hian Kolasib District chhunga State Awardee pahnih Pu Lalbeiseia, Kawnpui leh Pu Lalremliana, Kolasib te chu Khuallian hian chawimawina thil a hlan a. Headmaster retired Pu RV Thansang leh Pu Lalhmingliana, PTA aiawh ten thu an sawi bawk a. Pu Lalrammawia Kawlni, DPC, SSA chuan inlawmna thu sawiin school thlanchhuah atangin zai leh lam te entir a ni bawk a ni.

Teachers Day hi chawhma lam khan school tinah hman hmasak a nih hnuin District huap lawmna hun hi hman a ni a. Hetah hian zirtirtu tanglai leh pensioner te an tel thahnem hle a ni. Pu Lalrambuatsaiha, SDEO(K) chuan lawmthu sawiin hun a khar a ni.