Vawiin khan Kolasib–a Brig C. Vankunga Shopping Centre –ah Workshop on Telecom Consumer Education and Cable TV neih a ni a. Workshop hi Pu Lalchungnunga, SDO (S) in a hawng a ni.

Hawnna thu sawiin Pu Lalchungnunga chuan, Tele communication leh Electronic Media chak takin kan khawvel min luah chho ta mek a. Tun hmalama kan hriat ngai loh Telecom Company tamtak tunah chuan an lo lut ta a. Hetih lai hian Kolasib District chhung hmun thenkhat chu Internet facility in ala pawh lohte an ni a. Hnathawhna kawng hrang hranga awlsamna min pe turin heng internet tehi kan mamawh ta hle a ni, a ti a. Chutih laiin heng Service Provider te hian keini consumer te chanvo dik tak hi min thawhsak em tih pawh vawiina kalkhawm te hian i zir chiang ang u, a ti a. Harsatna kan tawh hrang hrangte he workshop hmang hian sutkian dan i ngaihtuah tlang ang u, Pu Lalchungnunga chuan a ti a ni.

Workshop hi Mizoram Consumer Union Hqrs. leh Kolasib District Consumer Association ten an buatsaih a ni a. Pu Lalbiakthanga, President, KODCA in a hawnna programme hi a kaihruai a. Pu Lalhmunsiama, Secretary KODKA chuan report pein Workshop thiltum leh tangkai taka an hman theih dan tur te a sawi a. Pu Thanglura, President, Mizoram Consumer Union, Hqrs. leh Dr. Chawngsailova, Editor, Consumer magazine ten Consumer te hmakhaw hrang hrang leh Dan te sawiin training an pe ani.

Hemi hnu hian mipui lam atangin a duh apiang tana zawhna zawh hun siam a ni a. Hetah hian BSNL, Airtel, Vodafone, Aircel etc. leh Cable TV chungchanga hriat belh duh neite leh harsatna nei ten zawhna an zawt hlawm a. BSNL in Bill a sem chhuah dan leh Bill pek hun in mil lo chung chang leh phone disconnect tam tak chungchang te chu zawhna langsar zual an ni. Heng zawhna te hi Service provider hrang hrangten an theih ang angin an chhangin an hrilhfiah hlawm a ni.