1931/2026-2027

Kolasib, 25th August, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin, zirlaite zinga ruihhlo laka invenna dan tur siam mek, 'The Mizoram State School Drug Policy 2026 (Draft)' chungchang ngaihtuahin thutkhawm pawimawh tak neih a ni.

Thutkhawm kaihruaitu Bawrhsap Pu H. Dolianbuaia chuan he draft policy pawimawh zia hi sawiin, zirlaite leh thalaite zinga ruihhlo hluar chho mek chu a pawi hle tih a sawi a. "Kan ram leh hnam hmalam hun chu tunlai thalaite leh sikul naupangte kutah a innghat a. Ruihhlo laka kan zirlaite an him theih nana dan leh kaihhruaina mumal tak kan nei tur hi a lawmawm a, he policy hi a taka hman a nih hunah tangkai taka hmang a, a hlawhtlin nana theih tawp kan chhuah ho a ngai a ni," tiin he dan duangtute leh a bawhzuitute pawimawhna a sawi lang bawk.

Pu Lalrinpuia Varte Superintendent of Police (SP) pawhin thu sawiin, ruihhlo hian suahsualna leh pawi khawihna dangte a hrin chhuah thin avangin dan kengkawhtute lam atang pawhin he policy lo chhuak tur hi pawimawh a tih thu a sawi a. Zirlaite zingah ruihhlo luh theih loh nan venhimna (security) tha zawk a awm a ngai a, khawtlang leh police tangkawpin ruihhlo thehdarhtute laka zirlaite venhim leh chhanhim chu mawhphurhna pawimawh tak a ni, a ti.

He thutkhawmah hian The Mizoram State School Drug Policy 2026 (Draft) chungchang chipchiar taka sawifiahna leh thlirhona neih a ni. He policy hi zirlaite tana him, thlawpna tha leh ruihhlo awm lohna zirna hmun siam tumna a ni. Tarlan a nih danin, Mizoramah ruihhlo hluar lutuk avangin sikul chawlhsan, suahsualna leh rilru lam natnate a thleng thin a. Kum 2019 data-in a tarlan danin naupang kum 13 atanga 15 inkarah vaihlo hmuam leh zu (tobacco use) za zelah 58 lai an awm a, he policy hian hengte hi tihkiam a tum a ni.

He policy tum ber chu vaihlo, zu leh ruihhlo dangte tih tlem leh ven a ni a. Hremna lam aiin zirtirna, puihna leh siamthat (rehabilitation) lam a ngai pawimawh zawk a. Ruihhlo bawiha tangte chu endawng an nih loh nan leh, theihna an neih anga sikul danga tha taka an luh chhunzawm leh theih nan ruahmanna a siam a ni.

Zirlaite nunphung tha zawkah chherchhuak turin 'Life Skills' leh rualpawlna (interactive learning) hmanga zirtirna pek te, ruihhlo lam an hnaih dawn tih hriat lawk leh an zirlai a tlakhniam theihna laka ven (early intervention) te leh an harsatnate hriatpui tura screening leh counseling neih chu he dan duan mekah hian ngaih pawimawh a ni.

Sikul tinah Anti-Drug Committee din tura ruahman a ni a, he committee hi thla thum danah vawi khat tal thukhawm tura tih a ni. Hei bakah hian School Education Department, Health & Family Welfare, Social Welfare, Excise & Narcotics, nu leh pa, kohhran leh NGO te tangtlanga hma la ho turin ruahmanna a siam a. NDPS Act, COTPA, RTE Act leh Juvenile Justice Act te nena inmil tura duan a ni bawk.

He policy hian hmalak dan tur hun tiam (deadline) a nei a. Gazette-a tihchhuah a nih atanga thla 8 chhungin zirtirtute tana training module siam chhuah tur a ni a. Kum 1 chhungin sikul tinin Health & Wellness Ambassador emaw counselor an nei tur a ni a, kum 5 danah policy hi ennawn  thin a ni ang.

Bawrhsap chuan he draft policy chungchangah hian tha tih zawng emaw rawtna  tha zawk neite chuan District Education Officer (DEO) hnenah thlenin, thehluh theih reng a nih thu leh ngaihtuah ho theih a nih thu a sawi bawk.

He hunah hian Pu Vanlalchhana, DEO; Dr RK Lalthlamuana, Sr CMO, Assistant Commissioner of Excise & Narcotics; School Education lam official-te leh tlawmngai pawl (NGO) aiawhte an tel a ni.