No.2426/2021-2022

Aizawl, 1st October 2021 : Urban Development and Poverty Alleviation Department, Kolasib chuan ‘Azadi Ka Amrit Mahotsav’ Week hmanna kal zel ah vawiin chawhnu dar 1:00 khan UD&PA Conference Hall, Brig. C. Vankunga Shopping Centre, Diakkawnah ‘Waste to Art Exhibition’ an buatsaih. Hemi hun ah hian bawlhhlawh paih mai tur hmang tangkai a thil siam te pho lanna hun neih a ni.

Pu Gaston Vanlalhriatpuia, District Urban Development Officer chuan he hun ah hian thusawiin, mihring chenna khua leh veng vawngfai tur chuan mitin mahni in leh vel atanga faina hna kalpui a pawimawh thu a sawi a, “Faina hi a hranpa in a awm ngawt thei lova, keimahniin kan rilru atanga faina ngaihpawimawhna leh fai tura hmalakna neih a ngai a ni” a ti.

‘Azadi Ka Amrit Mahotsav’ hmanna pual hian Kolasib khaw chhunga faina kawng titha lawmman chi 3 Pawisa fai leh Certificate hlanna neih a ni bawk, chungte chu :

1. Bawlhhlawh tawih thei leh tawih thei lo thliar tha ber vengah Tumpui Veng thlan a ni a, pawisa fai cheng 5,000 leh Certificate hlan an ni.
2. Faina chungchang a hma la tha ber Veng/VC ah Hmar Veng thlan a ni a, pawisa fai cheng 5,000 leh Certificate hlan an ni.
3. Vendors/Hawkers (Dawr te) zing a Polythene bag hmang tlem berah Zoremsiami, New Diakkawn leh Lalhmangaihzuali, Diakkawnte thlan an ni a, pawisa fai cheng 2,500 leh Certificate pek an ni.

‘Azadi Ka Amri Mahotsav’ hi India ram Independence vawi 75 lawmna pual leh kum 7 chhung SBMU kalpui a nih lawmna kal zel a Project kal lai a ni a. Vawiin a UD&PA Kolasibte’n hemi pual a ‘Waste to Art Exhibition’ an buatsaihna ah hian mi 22 te inelnaah hian an tel a, MJA leh ZOOM, Kolasib ten an endik a ni.