3360/2023-2024

2024 Pawlkut thla ni 16: Nimin, January 15, 2024 (Thawhṭanni) chawhma dar 11:00 khan Kolasib DC Conference Hall-ah Vairengte-Sairang inkara 4-Lane kawngpui laihna tura Package-7 chungchanga ram neitu complaint neite koh khawm niin, hearing neih a ni.

He hun hi Competent Authority for Land Acquisition (CALA) & Additional Deputy Commissioner, Kolasib District Pi Melody Ngurthantluangi chuan a kaihruai a. He hunah hian ram neitu leh VC ai awhte an kal khawm a ni.

Package-7 3A notification hi ni 22.12.2023 (Zirtawpni) khan "Vanglaini" chanchinbu leh "Chhuahtlang" chanchinbuah te chhuah a ni tawh a. Sawi duh neite tana complaint and objection hun hawn pawh a zo tawh a ni.

Package-7 (Kawnpui - Mualkhang inkar)-ah hian ram buai complaint nei mi 3 an awm a. He'ng complaint-te hi CALA & Additional DC Pi Melody Ngurthantluangi chuan a ṭul anga bawhzui nghal a nih tur thu a sawi.