1298/2024-2025

Dated Kolasib the 24th July 2024: Vawiin chawhnu khan Kolasib DC Conference Hall-ah District Election Officer Pu Robert C. Lalhmangaiha hovin Kolasib, Saidan leh Nisapui Village Council Draft Electoral Roll 2024 chu tlangzarh a ni a. Hemi hunah hian District Election Officer leh Pu Lalramliana, Election Officer Kolasib District, MUP aiawh te leh Election Office aiawh te an tel a ni.

Draft Roll tlangzarhtu District Election Officer Pu Robert C. Lalhmangaiha chuan Electoral Roll pawimawhzia sawiin MLA Election a ni emaw Village Council Election pawh ni se democracy ramah chuan Electoral Roll chu thil pawimawh tak a ti a, Sawrkarin a ngaipawimawh takzet a, chu mai bakah Roll-a chuang mipuite tan a pawimawh lehzual a, chuvang chuan a buaipuitute pawhin uluk takin an tha leh zung sengin an buaipui a. Ṭha taka Draft Roll peih fel a, tlangzarh a ni thei chu a lawmawm takzet a ni a ti. 

Rule 21 of the Mizoram (Election to Village Councils) Rules, 2014-in a tarlan danin India khua leh tui kum 18 tling chin leh an awmna Constituency-a hun tiam bituk chhung (ni 180) an awm tlin chuan chu an awmna Constituency-a Electoral Roll-ah register theih an ni a. Vawiinah Draft Roll tlangzarh taka a lan danin VC06036-Nisapuiah hian Draft Roll-ah mipa 322 leh hmeichhia 325 awmin an vaiin mi 647 an chuang a, VC06040 Kolasib Saidanah mipa 315 leh hmeichhia 302, an vaiin mi 617 an chuang ve thung a ni.