Kum 2015 atanga hman tan World Soil Day chu ‘Be The Solution to Soil Pollution’ tih thupui hmangin vawiin khan Krishi Vigyan Kendra (KVK) Kolasib ah hman  a ni.

He hun kaihruaitu Dr.Michelle C.Lallawmkimi, Senior Scientist & Head KVK chuan Leilung chu mihring te tana siam ani a, a tichhetu leh ti chereu tu chu mihring te tho kan ni a, leilung tha nei turin mahni hma zawnah tan lak theuh a pawimawh ani tiin kut hnathawk te chu kan pawimawh lehzual a, leilung vawnthat hi mahni huan leh lo ram atanga bul tan a ngai ani a ti.

He huna Khuallian Pu J.Rothanga, District Agricultural Officer chuan he khawvel ah hian ni chi hrang hrang hman thin a ni a heng ni hmanna ah te hian kawng hrang hranga inzirtir tharna leh intuai tharna hun neih thin a ni a, chutiang bawkin leilung vawnthat ni ‘world Soil Day’ pawh hman alo ni ve ta chu thil lawmawm tak a nih rualin leilung humhim hna hi kan tan har tep a, leilung humhalh leh duat na kawngah tan kan lak a ngai takzet a ni a ti. Heng ni hman thin te hian vawi leh khatah hmasawnna thlen teuh lo mahse a tahtawlin hmasawnna hmuh tur a awm thin a chu chuan kan chenna khawvel humhim leh enkawl chungchangah pawh hian hmasawnna a thlen a beisei thu a tarlang a ni.

Khuallian chuan he khawvel hi Pathianin mihringte tana malsawmna tamtak vur chunga min pek ani tiin leilung atanga hai chhuah tur thil tamtak a awm a, chu chuan khawvel hmun tin ah ei leh bar bakah kawng chi hrang hrangin hmasawnna a thlen a, chutih laiin mi thenkhat duhawm luat vang leh hausak duh luat vangin dimdawina reng reng nei lovin leilung chu an ti chereu vak thin a, hei hi Pathianin leilung a mihringte tana malsawmna a phum te hai chhuah dan tur ruahmanna piah lam ani a, kan chenna khawvel leilung bakah sik leh sa in nasa takin a tuar mek ani a ti.

Pu Rothanga chuan Khawvel hmun 5 a then a hmun 1 chauh hi leilung ani a (a bak hmun 4 chu tuifinriat), thiamna sang zel ah mihring thi kan tlem tial tial a, chak takin kan inthlah pung zel a, leilung zauh zawng hi a pung si lova, mamawh ang tawk leka leilung atanga malsawmna kan dawn te kan hai chhuah loh chuan khawvela cheng mihring te bawk hian keimahni dinhmun chu dinhmun derthawng ah kan indah thei a ni a ti. Scientist te chuan lei chunglang hang tha inchi khat (1 inch) siam tur in kum 100 a ngai a, tun ang renga kan leilung kan sawisa a nih chuan kum 10 chhungin tam a tla thei ani an ti a, heng mithiam te thil hmuhchhuah atang ringawt pawh hian mitin mai hian mahni hma zawn theuhah hma kan lak a tul ani tiin polythene bag hman loh leh Thing leh mau suat loh te chu leilung humhalh tura hmalakna pawimawh tak a ni a ti bawk.

Mithiam ten hmun dangah (thla, sikei sen etc..) inkap chhuakin khawvel leilung ang hi zawng thin mahse mihring te chenna tlak an hmu zo lova chu vangin Pathian ina min pek Khawvel leilung hi a chhunga cheng mekte bakah kan tu leh fa lo la awm zel tur te tan khawvel chhenna tlak leh khawvel hrisel zawk alo nih theih nan duat tak leh awmze nei taka kan enkawl a ngai ani ati bawk.

He hunah hian Hortoki, kawnpui leh Serkhan atanga kut hnathawk (farmer) 45 te hnenah Soil Health Card sem chhuah na hun hman bawk niin chawhnu lamah Pi Carolyn Zothansiami, Soil Scientist hoin technical session hman nghal a ni.