Vawiin khan Bawrhsap pisa pindan ah Kolasib bawrhsap thar Pu Zoengsanga leh Kolasib Media mi leh sa te chu thingpui in hona neih pah in an inkawm.

Bawrhsap chuan Chanchinbu mi te chu sawrkar thiltih leh hmalaknate mipuite hriata pholang tu leh puangzar tu an nih angin dik tak leh rinawm taka thawk thin turin a chah a. Sawrkar hmalaknaah mipuite atanga ngaihdan awmte pawh hrilh hre  thin turin a chah a. Media te’n mipuite hnena zirtirna hnathawh tur pawimawh tak an nei a, Dan leh thupek kenkawh kawngah te, HIV/AIDS leh Ruihhlo dona kawngah te, hriselna kawngah leh zirna lamah lungrual taka beihpui thlak a ngaih thu leh mitin huapzo zirtirna zau thei ang ber media hmanga neih a tul thu pawh a sawi a. Kolasib District chu pen khat tala District hmasawn zawka siam turin Media- Tv/Chanchinbu  Editorial ah te zau zawk leh Khawtlangah NGO te kaltlangin uar zawka kalpui nise tha a tih thu a sawi a.  MJA member-te chu sawrkar hmalakna  leh scheme hrang hrangte zau zawka puanzar anih a mipui ten an hriat  zel theih nan   thawhpuiah a sawm a ni.

Inkawmhona ah hian Chanchinbu mi te pawh in Advertisment chungchang leh harsatna hrang hrang an neih te bakah Kolasib District tana hmasawnna tur leh thil pawimawh chi hrang hranga hmalakna tur tul ni awma an hriat te chu Bawrhsap hnenah hian thlenin, Bawrhsap chuan theihtawp a chhuahpui tur thu a sawi ve bawk a ni.

Kolasib District ah hian MJA member 16 an awm mek a, Chanchinbu 12 (Daily 11 leh weekly 1) chhuah ani a, Kolasib khawpui ah Chanchinbu 8 (Daily 7 leh weekly 1), Vairengte ah Chanchinbu 2, Bilkhawthlir ah chanchinbu 1 leh Kawnpui ah chanchinbu 1 te an ni.