Kolasib CMO Office hmalakna in Scrub Typhus leh Rotavirus Vaccine chungchanga Kolasib District chanchinbu mi te tana inzirtirna hun chu vawiin khan Kolasib CMO Conference hall ah hman a ni.

Kolasib CMO Dr.Hmingthanmawii chuan chanchinbu mi kalkhawm te chu lo lawmin Health Department hnuaiah hmalakna tam tak mipuite hriat ngei ngei ngai chi a awm tih a sawi a, chung hmalakna(health programme) te mipui hnena thlentu pawimawh tak chu chanchinbu mite an ni tiin mipuiin awareness an neih that tawk loh thin avangin inenkawlna chungchangah harsatna te an tawk fo a chu mai bakah hamthatna an dawn theih tamtak an dawnloh phah fo ani a ti bawk. Kolasib District mipuite an lo hrisel zawk theihnan leh hriselna chungchanga hawi her zau zawk an lo neih theihnan chanchinbu mite chu thawhhopui ah sawmin mipui thleng phak rawngbawlna kan neih a pawimawh takzet ani a ti.

Dr.RK Lalthlamuana District Immunization Officer chuan kalkhawmte hnenah Rotavirus leh a Vaccine chungchang zirtirna a pe a Rotavirus hi naupang kawthalo thlentu pakhat ani a, he hrik ina a tihbuai naupangte chu khawsik, luak chhuak leh kawthalo ten a zut a, ni 1 atanga ni 3 inkar chhungin a rawn lang chhuak thin a ni. Hemi hri danna tur hian Rotavirus vaccine chu naupangte pek an ni dawn a, Vaccine hi tum 3 (thum) lak tur niin kar 6, kar 10 leh kar 14 a upa an nih in naupang ka a thlawr tur ani. vaccine lak zawhah pawh naupang chu a khua a sik, luak, tap bang theilo leh pum na emaw pum puar emaw a nih chuan bialtu Doctor pan vat tur a ni. Rotavirus vaccine hian naupang kawthatlohna chhan pui ber natna hrik lakah a veng a, India Rama naupang maktaduai 30 chuang hnenah pek tawh niin side effect engmah hmuh a niloa , he hri avanga kawthalo awm thin chu nasa takin a tlahniam a ni.

Rotavirus vaccine hi India ram state thenkhat ah chuan kum 2016 atanga pek tan niin Mizoram ah hian kumin July thla chhungin Sawrkar in a tlangzarh beisei ani a, Kolasib District ah chuan Primary Health Centre zawng zawngah he hri danna hi a lak theih dawn a ni. Dr.RK Lalthlamuana chuan Sawrkar damdawi ina Nu ten an fate natna hri hrang hranga laka indanna/venna an lak hian sum tam tak an hum thin a, chhungkaw harsa zawk te tan chuan thil hlu tak ani tih a tarlang bawk.

Dr.H.C. Lalnunhlua MD chuan Rannung seh natna (scrub typhus) chungchangah zirtirna a pe a, Scrub typhus natna hi kum 1899 khan Japan ramah hmuchhuah a ni a, Mizoram ah chuan kum 2012 atang khan Directorate of Health Services in a buaipui chho tan a ni. Scrub typhus natna hrik hian khawsik,tlun,lu na, taksa na leh sil, rilru fimlo leh buai bakah nikhaw hriatlohna te in mihring a tibuai a, a hrik in taksa a seh atanga ni 10 atanga ni 12 inkar vel ah a langchhuak thin a, enkawl thatloh chuan thihna hial a thlen thei a ni. He natna hi mihring kum 21 leh kum 40 inkar ah hmuhchhuah tam ber a ni a, Mizoram ah chuan July 2018 thleng khan mi 42 in an thihpui tawh ani.  Kolasib Distrcit ah Kum 2018 chhung khan mi 226 test zingah mi 31 chu he natna hrik kai an ni tih hmuchhuah a ni a, he natna avang hian mi 5 admit niin, Record ah he natna avanga thi an la awmlo.

Scrub Typhus natna thunun/tih tlem dan pawimawh tak chu rannung seh nia inhriat chuan a rang thei ang bera Doctor in entir bakah he natna hrik pu darhtu bulpui ber Sazu lam chi (rodent family) chu kan chenna hmunhmate an tana khawsak remchang lo tura siam a ni.

He hun hi Kolasib Dsitrict MJA President Pu R.Lalhmingthanga’n lawmthu sawiin a khar a ni.