Vawiin chhun dar 12.00 khan Kolasib DC Conference Hall-ah NLUP Nodal Officer leh Addl DC ni bawk, Pu Lalfela Sailo hovin NLUP chungchangah meeting pawimawh tak neih a ni a; hetah hian Kolasib District chhunga NLUP kaihhnawih Department hotute an tel vek a, Aizawl atangin NIB Chief Media Officer Pu Dvaid L. Thangliana leh Media Officer Pi P.B. Lianthangpuii te pawh an tel a ni.

Vawiina meeting-ah hian NLUP hnuaia Department hrang hrangte hnathawh dan mipuite hnena zau zawka puan zar dan tur leh a vil zui dan turte chipchiar taka sawiho a ni a. Pu Lalfela Sailo chuan, “NLUP hlawhtlinna atana theihtawp kan chhuah mek laiin, kan hmalakna te, kan hlawhtlinna leh harsatna te kan inhriatpui a, mipui leh sawrkarin kan hnathawhte min hriatpui theihna tura uar lehzuala puan zar hi a tul tak meuh a ni” a ti. Chief Media Officer Pu David L. Thangliana pawhin media lama tanlak a ngaihzia sawiin, “NLUP hi eizawnna kawnga mirethei te khaichhuahna tura Mizoram sawrkar programme pawimawh leh lian ber a nih piah lamah, kan sik leh sa danglam zel tur venna leh kan ramngaw te, tuihna leh rambua zel tur humhalhna a ni a. Mipuite hnenah NLUP hmang dik tur leh a pawimawhna tlangaupui tam a ngai hle a ni” a ti.

Vawiina meeting-ah hian Department hrang hrang hotute chuan tunhma zawng aiin an hnathawh leh hmachhawp te inhriatpawh tawn tul an tihzia an sawi a; DIPRO chu NLUP hnuaia District Media Officer a nih tak avanga tualchhung chanchinbumite nen tangruala NLUP hmalakna tlawh thin ni se tih an rel a ni.Nodal Officer kaihhruaina hnuaiah zing zawka meeting neih thin te an rel a ni. Hmalakna hmasa atan Department hrang hrangten NLUP dawngtu chhungkaw 3 theuh an thawhkhawm ang a, chungte chu a tahtawla tlawh chhuah vek tura dah a ni.

Vawiin vek khan MJA, Kolasib District te nen inpawh takin Department hotute nen meeting neih zui nghal a ni a; chanchinbumite pawhin NLUP chungchang puanzarna kawnga an tangkai theihna kawng apiangah sawrkar thawhpui an inpeih thu an sawi a ni.