346/2026-2027

Kolasib, 30th April, 2026: Vawiin khan DC Conference Hall, Kolasib-ah Kolasib Deputy Commissioner Pu H. Dolianbuaia hovin District Level NCORD thutkhawm neih a ni a. He hunah hian Kolasib District chhunga ruihhlo darh zau zel tur ven dan leh ruihhlo do kawnga hmalak dan tur hrang hrangte sawiho a ni.

Thutkhawmah hian Member Secretary, Kolasib Superintendent of Police (SP) Pu Lalrinpuia Varte chuan inlawmna thu sawiin, Kolasib Police ten district chhunga ruihhlo tawlh luh leh tawlh chhuah danchah nan theihtawp an chhuah mek thu a sawi a. Ruihhlo ngaite enkawl (rehabilitation) lamah district-in hma a sawn zel thu leh, Jordan Centre pawh Mizoram Synod-in an enkawl chhunzawm dawn avangin hetiang kawngah hian a chhawk zangkhai a beisei a ni, a ti. Ruihhlo hluarna hmun (hotspot mapping) chu Police ten an lo nei tawh a, amaherawhchu a kimchang zawk neih a nih theih nan a zau zawka thawhkhawm a pawimawh thu a sawi. Ruihhlo tawlhtute an fin tawh em avangin man chhuah an harsat thu leh, ruihhlo addict te chu dan hmanga hrem ngawt theih an nih loh avangin rehabilitation centre-a dah luh an ngaih thin thu sawiin, hemi kawngah hian mitin tanrual a tul takzet a ni, a ti bawk.

Thutkhawm kaihruaitu leh District NCORD Chairman nibawk Kolasib DC Pu H. Dolianbuaia chuan ruihhlo dona kawngah mitin huapa inzirtirna (awareness) neih uar a tul thu a sawi a. Ruihhlo la khawih ngai loten an fihlim pui zel theih nan a bika rawtna siamin, Sunday School leh sikul hrang hrangah naupangte hnena zirtirna tha tak pe thei tur mithiam (specialist) Aizawl emaw hmun dang atanga chah luh chu a pawimawh thu a sawi . Ruihhlo do tur hian Village Council, NGO, Rehabilitation Centre leh mipuite tangtlanga kan thawhho a ngai a ni, a ti a. Police te, tlawmngai pawl hrang hrang, VC leh Rehab Centre ten mahni theihna zawn theuha ruihhlo umbo nana theihtawp an chhuah thin chu lawmawm a tih thu sawiin a fak bawk a ni.

He hunah hian SDPO Pu R. Lalnunpuia chuan Powerpoint Presentation pe in, kum 2016-a sawrkar laipuiin NCORD a din chhan chu ruihhlo hman tlem (Demand reduction) leh a tawlh luh tihtawp (Supply reduction) kaltlanga India ram chu 'Drugs Free' a siam tumna a nih thu a tarlang a. Thla tir ni 16 atang khan Rengtekawn-ah YMA te nen tangkawpin highway duty neih tan a nih thu a sawi. SDPO hian kumin 2026 chhunga Kolasib District Executive Force (DEF) ten ruihhlo leh zu an man dan tlangpui a tarlang a:

KUM 2026 CHHUNGA KOLASIB POLICE TE RUIHHLO LEH ZU MAN ZAT:

Heroin (No. 4):Gram 1364.82 man a ni a, a hlutna hi  Rs. 26,22,70,950/- hu a ni a. He thilah hian mi 12 manin, thubuai (cases) 7 ziah luh a ni.

 Zu (Liquor):IMFL litre 2214, Beer litre 1227 leh LML litre 37 man a ni a. A hlutna chu Rs. 13,73,980/- hu niin, mi 10 man an ni a, thubuai 7 ziah luh a ni bawk.

NCORD thutkhawm hian hmalak chhunzawm dan tur relin, khaw tinah 'Village Level Task Force' din nise an ti a. Kolasib khaw chhungah chuan SP leh District official ten ruahmanna an siampui ang a, thingtlang khuaah te chuan BDO leh Police te leh khawtlang hruaituten hma la se an ti. Ruihhlo that loh zia inhrilhriatna (Awareness) uar taka kalpui nise tiin, District Education Officer (DEO) hmalaknain sikul hrang hrangah Education Awareness pek nise tiin an rel a ni bawk.