No.3264/2019-2020

Vawiin chawhma khan DC Conference Hall, Kolasib ah Dr H Lalthlangliana, DC Kolasib hovin COVID-19 lak a invenna kawng a hmalakna kalpui mek Lockdown chhung a Kolasib district inbuatsaih dan leh inpuahchah chhunzawm dan tur te relin District Level Task Force on Covid-19 Committee ten thutkhawmna hun an hmang.

Dr H Lalthlangliana, DC Kolasib chuan Kolasib district chu Mizoramin a chakkhai kan lamna kawng pawimawh tak a nih avangin ei leh bar leh thil mamawh zual bik ah te mipuiin harsatna kan tawh loh nan bungraw pawimawh te chu chatlak lova, a lo luh zel theih nan hmalak a ni, a ti a, Essential Commodities lak luh chungchangah harsatna a awm loh nan Nodal Officer ah Pu Benjamin Lalzama, Project Director, DRDA, Kolasib, (Phone number 9612466849) chu ruat nghal a ni.

Vawiin thutkhawmah hian Kolasiba Quarantine Facilities a awm te tan Kohhran hrang hrang hruaitute nen Counselling hun mumal tak a ruahman a nih tur thu leh Electronic media kaltlang a Counselling pawh Psychologist ten an pek thin dawn thu tarlan a ni a. Quarantine facility a awm te kawng hrang hrang a pui duhtu an awm a nih chuan, inbiakpawhna awlsam leh felfai tak a siam a nih tur thu sawi a ni bawk.

Khualzin Mizorama lo lut tur, Silchara tangkhang mek mi 39 an awm a, heng mi te lam tur hian Bus 2 tirh thlak an ni. Anni zing a mi 25 te chu Risk State ni a ngaih atanga lo lut an nih avangin Quarantine Facility ah dah hran nghal an ni dawn bawk a ni.

Dr H Lalthlangliana chuan, in Quarantine chu Covid-19 lak a kan invenna hmanraw pawimawh tak a nih avangin mi tin ten kan ngaih pawimawh lehzual a tul thu sawiin Quarantine facilities a awmte chu en hrang zawng leh thinhrik zawng a sawngbawl lo tur a inzirtir a pawimawh thu a sawi a. Hri vei tur a ngaih emaw rinhleh emaw an nih loh thu leh fimkhur avang a ni 14 chhung uluk tak a enthlak an ngaih vang chauh a dahran an nih thu a sawi bawk a ni.

Kolasib DC chuan Lockdown avanga lirthei che vel tlem lai chuhin, Kawnpui leh Sairang inkar kawng chu a rang thei ang ber a siam zawh a nih theih nana hma la turin a mawhphurtute a hrilh nghal bawk a ni.