597/2024-2025

Kolasib dated 29th May, 2024: Vawiin khan Pu John LT Sanga, Deputy Commissioner chuan ruah sur nasa avanga Tlawng lui lianin Bairabi khua hmun thenkhat a harsatna a thlen te chu a hmun ah kalin a endik a. Pu Gilbert Lalhlimpuia, SDC-in tawiawmin Bairabi khawtlang hruaitute nen tui lian vang a harsatna tawk chhungkua te chhawmdawl dan tur relin SDO (C) Conference Hall, Bairabiah thutkhawmna an nei a ni.

Pu John LT Sanga, Deputy Commissioner chuan chhiatrupna a thlen chang a a tul apiang a che chhuak thin khawtlang hruaitute leh tlawmngai pawl hrang hrangte chu khawtlang mipuiin an thlamuanpui hle thu sawiin Sawrkar hmalakna a chhanchhuah, tanpui leh chhawmdawl hna tihlawhtlingtute leh tichaktute an nih thu a sawi a. Zo nunze mawi, tlawmngaihna chhawm nungtu ni zel tur a chahin hma an lo lak tawhna chu fakawm a tih thu a sawi a, chhawmdawl hna thawktute mamawh zual phuhruk nan pawisa fai leh silpouline engemaw zah, khawtlang hruaitute hnen ah hian a hlan nghal a ni.

Bairabi khawtlang hruaitute tarlan danin tui lian avang hian nizan thlengin chhungkaw 21 chu hmun him lam ah sawn chhoh an ni tawh a. Tui lianin lawng te a lak bo loh nan tlaivarin vengtu an indah a ni. Tlawng lui hi kum 1989, 2008, 2017 leh 2018 khan nasa takin a lo lian tawh a, hemi avang hian kumin fur lo thleng tur atan pawh hian khawtlang hruaitute an lo inhmakhua lawk tih an sawi a. Vanneithlak takin kumin hian chhiatna liam tham thleng a awm loh thu leh chenna in chan an awm rih loh thu tarlan a ni a. Amaherawh chu tui lian hian tlawng kam a huan siam thahnem tak a tichhia tih an sawi a, ruah a sur belh rih loh avangin tui lian pawh a kam ve zel rih thu, khawtlang hruaitute hian an sawi a ni.