No.7508/2020-2021

Kolasib bawrhsap Dr.H.Lalthlangliana chuan Bairabi leh Hortoki inkar a Northeast Frontier Railways hmalakna hrang hrang a hmunah a enfiah a, hna kalpui mekte chu hunbi tuk chhung ngei a zo fel turin thawktute a chah.
Bawrhsap hi NF Railways Deputy Chief Engineer-2-Bairabi Pu Naveen Prakash in B78 lei dawhna hnunah a lo dawngsawng a, an hmalakna hrang hrang kalpui dan tlangpuite sawiin Kolasib district-a thuneituten kawng hrang hranga an puih thinnaah lawmthu a sawi. Meter 486 a thui B78 lei dawh mek chu March 2022 chhung a zawh hman beisei a nih thu a sawi. Hripui leng vangin duh ang zat hnathawk an hmuh zawh loh thu a sawi a, heti chung hian March 2023 chhungin hna zawng zawng hi zawh fel hman tum a nih thu a sawi bawk.
Vawiin hian Zonal Executive Magistrate Dr. Engkunga Chhangte leh DIPRO Kolasib, Pu Hmingthanzuala ten bawrhsap hi an tawiawm a, Kawnpui leh Hortoki huam chhung a NF Railways hmalakna hrang hrangte a hmunah enfiah niin naktuk hian Hortiko leh Bairabi inkar a hnathawhte bawrshap hian a tlawh chhunzawm leh dawn a ni.

Deputy Chief Engineer-2-Bairabi tarlan danin lei 55 dawh hna kalpui mek a ni a, a vaia a thui zawng belhkhawm hi Km 11.36 a ni. Heng lei zing a thui ber chu B17 a ni a, Bairabiah awmin Km 1.14 a thui a ni a, a sang ber hi Khamrangah awmin meter 112 a sang a ni. Bairabi leh Sairang inkarah hian tunnel 36 awmin, a thui zawng belhkhawm hi Km 12.64 a ni a, heng zinga tunnel thui ber hi Bairabiah awmin Km 1.88 a thui a ni.

Attachment

  • Loading attachment...