Vawiin khan Kolasib DC Pu H. Lalengmawia IAS chuan Hmar Veng High School an naupang leh zirtirtu te fuihna hun neiin Kolasib District ah Education Campaign bultanna a nei.

Pu H. Lalengmawia chuan President hlui Abdul Kalam a chanchin leh a thusawi te sawichhawngin naupangte a fuih a. Naupangte chu an tum ti sanga, beidawng lova harsatna hrang hrang hmachhawn a hma lam pan tur te, mahni inrintawkna nei tur te leh mahni inthununna nei reng turin a fuih a. Mi hlawhtling leh mi ropui te chuan heng thil, mi tinin kan neih sa hi bungrua hi hmangin theitawp chhuahin tan an la a, chuvangin an hlawhtling thei a ni, a ti. Nu leh pate thuawih leh an duh anga awm chu malsawmna a nih dante sawiin kawng engkimah an nu leh pate thu awih thin turin a hrilh a. Mihring nunah mawina ber chu thiamna a nih tih sawiin Pu H Lalengmawia chuan tumna a sang chuan tlakna pawh a sang a chuvangin tun atanga an tumna te tinsang turin zirlai naupangte hi a fuih bawk a.

Kolasib DC Pu H Lalengmawia chuan zirtirtu te chu text book ringawt duh tawk lova an subject kaihhnawih lehkhabu dangte chhiar leh rawn thin turin a chah a. Naupang an enkawlna leh an zirtirna kawnga entawntlak ni turin a chah bawk a ni.

He hunah hian DC tawimawmtu Additional DC Pu R. Lalremsanga leh DRDA Kolasib Project Director Pu Lalnunhlua te pawhin thusawiin zirlai naupangte hi an fuih a ni.