727/2025-2026

Kolasib, dated 3rd June 2025: Vawiin khan Kolasib DC Pu Robert C Lalhmangaiha chuan tunlai ruahsur vanga Bairabi leh a chhehvel , a bikin Tlawng dung a chengte, tui chim chin san avanga hmun him lama insaseng ngaite dinhmun enthlithlai turin leh Bairabi a Sawrkar hmun pawimawhte en turin Bairabi a tlawh.

Kolasib DC hian Bairabi ahhian SDO (Civil) Conference Room ah SDO Civil, Pu Chinlianmanga leh khawtlang leh YMA hruaitute leh Police aiawhte inkawmna a neihpui a. DC chuan nikum ang tho in kuminah fur a thleng hma a Bairabi pawh an tawrh an hlau hle a ni tih sawiin, an harsatna tawh dan te leh eng anga ruahmanna siam tur nge tihte chu Bairabi an tlawh chhan ber pakhat a nih thu a sawi.

Bairabi a SDO civil te, Police te VC te leh YMA te chungah tun hnaia ruahsur nasat vanga mipuite him nana an thawhrimna ahte lawmthu a sawi.

Bairabi ahhian tuilian avang hian chenna in rauhsan leh bungraw senghawi ngai engemawzat awm in, chenna in atanga insuan chhuak a hmun him lam pan (Relief Camp) a khawsa chhungkaw 25 an awm bawk a ni. Nimin lamah heng harsatna tawkte hi Bairabi SDO (Civil ) in tlawh tawh in leimin dawlna tur silpauline te sem chhuah nghal a ni. Rikrum thila inven nan North Branch YMA-te kutah silpauline -4 (double) hlan ni in North Village Council hnen ah silpauline -4 (double), South Village Council ah-3 (double) hlan a lo ni tawh bawk.

Tlawng lui hian kiam lam pan zelin tun dinhmunah hlauthawnawm a awm rihlo a. Report ziahlai hian Tlawng lui hi feet-5 in a tlahniam tawh bawk a ni.

DC hian tuilian avanga harsatna tawkte dinhmun leh enkawl zel dan tur khawtlang hruaitute a sawipui zawh hian Bairabi a sawrkar hmun pawimawh; ILP Checkgate, Railway Station, FCS Godown te a tlawh nghal bawk a ni.

Vawiina Kolasib DC in Bairabi a tlawhna ahhian Kolasib Additional DC, Pi B Malsawmtluangi, Bairabi SDO, Pu Chinlianmanga, Bairabi khawtlang hruaitute leh YMA hruaitute an tel a ni.