No.134/2021-2022

Kolasib dated 14th April 2021: Vawiin chawhma khan Dr.H.Lalthlangliana, Deputy Commissioner, Kolasib district chuan April ni 8, 2021-a Sub headquarters YMA, Kolasib district hruaitu thlan tharte nen a pisaah inkawmna hun an nei a, kum puan ‘Zirna Uar’ chu Kolasib district-ah sawt zawk a kalpui dan turte sawiho a ni.

Deputy Commissioner chuan YMA chu mipui tan a ding, mirethei leh chanhaite tuam hlawmtu, ram leh hnam tan a thawktu pawimawh tak a nih thu sawiin Sub Headquarters YMA Kolasib district hruaitu thlan tharte chu a lawmpui thu a sawi a. Hrileng dona kawng a an thawh hlawk zia tarlangin Sawrkar hmalakna tichak zawng a thawhho chhunzawmpui ah hruaitu tharte chu a sawm nghal bawk a ni.

Pu Thomas D.Lalengliana, President, Sub Headquarters YMA, Kolasib pawhin thu sawiin, YMA kum puan ‘Zirna Uar’ tihlawhtling tur chuan ruilhhlo do tel a tul thu a sawi a, zirlaite hmasawnna tur chuan rilru fim tak, ruihhlo tih buai loh neih tir hmasak a pawimawh thu a sawi.

Sub Headquarters YMA, Kolasib district Office Bearers-te pawhin thusawina hun neiin, hrileng avang a zirna in a tha lo zawng a nghawng a neih theih dan te, khawsak dinhmun a inchen loh avanga Online class leh online exam kalpuina kawng a harsatna awmte leh zirna In chu tutan pawh a banphak a nih theihna tur a hmalak a tul thute sawi lan a ni.

Kolasib Sub-Headquarter YMA hruaitu tharte;

President : Pu Thomas D. Lalengliana.
Vice President: Pu C. Liankunga
Secretary: Pu Lalnunmawia
Asst. Secretary: Pu Jerry Zoremsanga
Treasurer: Pu Timothy Lalchhuanawma
Fin. Secretary: Pu Samuel Lalfela