Kolasib Dy.Commissioner Pi Niharika Rai, IAS leh Kolasib a thuthar thehdarhtute chuan nimin tlai khan DC Office chamber ah inkawm hona hun hmangin District chhung hmasawnna tura hmalakna hrang hrangte an sawi ho.

Pi Rai chuan Kolasib district chhungah thla thum  DC a nih chhungin thil tamtak a zir tawh thu a sawi a. District chhung hmasawnna chu a ngaih pawimawh hmasak ber a nih thu leh mipui te chu amah leh a office an dawr kawngah tawng thuah a ni emaw, tumah inthlahrung  lo tura a duh thu a sawi a. Hmasawnna kawnga a thil tihtur apiangah Media te chu amah tawiawm thin turin a chah a ni. NLUP kalpui mek chungchangah dik leh fel taka thawh a duh thu leh a dawng thei tura sawrkarin a tihte chauh dawntir tura hma lak a nih thu a sawi a. Kolasib District chu ramri depa awm a nih avanga diklo taka hnamdang lo lut tur dan kawnga tan lak ngai a nih thu sawiin tun hnai atang khan Inner Line Permit pekchhuah kawngah uluk leh khauh zawka Dan anga  thiltih a ni, a ti a. Pianphunga rual ban loten hamthatna an dawn tur ang an dawn ngei theih nan khua leh veng tin VC te kaltlangin rualban lote hi dap chhuah mek an ni, DC chuan  a ti bawk.

Pi Lallianpuii, DIPRO, Kolasib chuan he hunah hian District chhung hmasawnna atana District rorelna sang ber office leh Media te thawh ho that a pawimawh zia sawiin hmasawnna ngaisangtu DC an neih avanga lawmthu a sawi a. Kawng tinrengah intawiawm tawn tha a tih thu a sawi a ni.

Media ten an thil ngaimawh hrang hrang an thlen te sawi ho a ni a. Mizoram chak lakna kawng pawimawh leh rim tak Kolasib - Bairabi Road chhe lutuk chu fur ruahtui tlak leh hma ngeia tih that an duh thu te, Kolasib Civil Hospital kawng chhe tak mai chungchang leh Broadband service tih that an duh thu te sawi a ni a. Pi Niharika Rai chuan hengte hi a theih anga bawhzui nghal a tum thu a sawi a. Serlui B  hmun chu a tlawhtu apiangte mit ti tlai thei tura mawi leh changkang taka cheibawl tura tan lak a tum tih pawh a sawi a ni.