Vawiin khan Kolasib DC thar Pu H.Lalengmawia IAS chuan Kolasib DC nihna chu DC chhuakta Pu Jitender Yadav IAS hnenah atangin a la a. DC charge inhlanna ah Kolasib DC Office-a a officer te an tel kim vek a ni.

Charge inhlanna ah hian Kolasib DC thar Pu H.Lalengmawia, IAS chuan pawl emaw sawrkar emaw hnathawh that(efficiency) chu a thawk a te thawhhonaah a innghat a. District leh District mipuite hmasawnna atan Department hrang hrang thawhhona leh intawiawm tawna a pawimawh a tiin chu chu a ngaihpawimawh leh a beisei anih thu te a sawi bawk. Pu Jitender Yadav chu a kal zelna turah duhsakna a hlan a ni.

Hemi hnu hian DC Pu Lalengmawia chuan Mizoram Journalists' Association Kolasib District hruaitute leh member te chu leng a sawmin, inkawmna hun tha tak an nei a. An inkawm hona hunah hian a thil ngaipawimawh zual te sawilangin thutharthehdarhtu te chu mipui rorelna sawrkar democracy ti nuamtu an nih thu te, sawrkar leh mipui inkara rawngbawltu pawimawh ber an nih thu te leh media tel lova Sawrkar a kal theih loh thu te a sawi a ni.

DC thar Pu H. Lalengmawia chuan ramri chungchang chu a ngaihpawimawh hmasak ber a ni a tiin state thenawm te nen boruak ralmuang leh muanawm a awm chhunzawm zel theih nan theitawp a chhuah tur thu leh hma a lak tum thu a sawi a. Cachar DC leh Hailakandi DC te chu a hman hmasak berah a lenchilh tum thu a sawi bawk. Zirna hi ram leh hnam nghahfak leh ro te zinga a hlu anih thu sawiin DC chuan Kolasib District-a zirna tha leh chenfakawm zirlai te an neih theih zel nan theitawp a chhuah dawn a,hemi atan hian zirna in hrang hranga Education Campaign neih a duh thu a sawi bawk.

Pu H.Lalengmawia chuan Department hrang hrang te thawhhona tih that leh tih chak leh zual a tum thu sawiin thawhhona a phuisui chuan hmasawnna a chak thei a ni, a ti. Sawrkar flagship programme NLUP chungchang sawiin Kolasib hian potential a nei sang a, chuvangin NLUP ah hian achievement sang ber ni tura hma lak leh thawh kan tum dawn a ni, a ti a. A vilna(monitoring) chu ngaihpawimawh leh zual anih tur thu a sawi bawk.

Kolasib DC Pu H. Lalengmawia hi 1991 khan Mizoram Civil Service ah lutin kum 20 chuang Mizoram Sawrkar ah dinhmun pawimawh tak tak te chelh hnuin IAS a hlankai a ni a, 2006 IAS AGMUT cadre allot a ni a. Zirna lamah chuan MA(Public Adminstration) niin Sawrkar hna a thawh hma hian High School zirtirtu hna leh NEHU Mizoram Campus ah Lecturer hna te a lo thawk tawh thin a. IAS ah hlankai anih hnuin Jt. CEO, Director, School Education Department leh Champhai DC hna te a chelh a, tunah hian Bihar MLA Election neih mekah Rohtas District atan General Observer a ni mek a. Hemi chungchangah hian karleh khian Bihar a pan dawn a, November ni 11 velah lo haw leh turah beisei a ni.