No.4399/2020-2021 

Kolasib 23rd August 2020: Vawiin chawhma khan Dr H Lalthlangliana, Deputy Commissioner, Kolasib chuan a pisaah Kolasiba thutharthehdarhtute kawmin Covid-19 positive hmuhchhuah thar 5 te zinga mi 2 te chu Quarantine Centre a awmsa an nih thu leh mi 3 dangte pawh an chetvelna hnuchhui hna ngawrh tak a bawhzui mek a nih thu a sawi.

Dr H Lalthlangliana chuan, Zangena Petrol Pump positive contact tracing zing a Bukpui 1, Meidumah 1 leh Saipum 1 tel ve te chu an veivahnate ngun tak a enzui an nih thu leh hnuchhui hna ngawrh tak a kalpui a nih thu a sawi a," Primary Contact tracing hi vawiina tihzawhfel tum a ni a, a tul dan azirin Secondary Contact tracing hi neih a ni ang," a ti.

Kolasib DC chuan, Positive case thar nitin hmuh belh reng a nih avangin chhuah tam loh te, kut sil uar leh hmai tuamna vuah te ngai pawimawh zel turin mipuite a chah a," Chiaina hian he hri lak ah min venghim dawn lova, rilru fim tak nen fimkhur tak a kan nitin hun kan hman a ngai a, he hri lak a kan him theih nana kan zawm tur hrang hrangte hi kan ngaih pawimawh zual deuh deuh a ngai a ni," a ti.

Vawiina thutharthehdarhtute a kawmnaah hian Dr H Lalthlangliana chuan Kolasib hmun hrang hrangah random testing kalpui a nih theih nan Mobile team dah belh turin ruahmanna a kal mek thu a tarlang bawk a ni.

Vawiin vek hian District Hospital, Kolasiba Mini-PCR dahna tur hmun hi Dr H Lalthlangliana hian a tlawh a, Mini-PCR khawl hnathawh dan tlangpui Dr Lalrawngbawla Colney, Medical Officer-in sawifiahin, hman theih a nih hunah chuan nikhatah sample 10 atanga 20 endik theih a nih tur thu a sawi. Dr Dorris Lalnunmawii Sailo, DMS leh thawktu dangten DC hi an tawiawm a ni.