2365/2023-2024

2023 Khuangchawi thla ni 18: Mizoram Legislative Assembly Inthlanpui, 2023 lo awm tura Kolasib District huam chhunga assembly constituency pathum awm zinga pahnih, 5-Kolasib (ST) leh 6-Serlui (ST) biala chuh tum Mizo National Front (MNF) official candidate-te chuan vawiin khan Returning Officer (RO)-te hnenah inthlan chuh turin nomination an theh lut.

MLA Inthlanpuia chuh tumte tana hming pek luhna hun hawn mekah vawiin khan Kolasib biala MNF official candidate, Bialtu MLA ni lai Pu K. Lalrinliana chuan Kolasib AC Returning Officer Pu John LT Sanga hnenah nomination paper a theh lut a. Kolasib District chhunga kumin MLA Inthlanpui chuh tuma hming pe lut hmasa ber a ni.

Serlui biala MNF official candidate, Bialtu MLA ni lai Pu Lalrinsanga Ralte chuan vawiin vek khan Serlui AC Returning Officer Pu Lalmuan Puia hnenah nomination paper a theh lut bawk a. Heti hian Kolasib District chhunga kumin MLA Inthlanpui chuh tuma hming pe lut pahnih an awm ta a. Tuirial bialah erawh chuan inthlan chuh tuma hming pe lut hi an la awm rih lo a ni.

Inthlan chuh tumte tana hming pek luh theih hun hi bial tinah October ni 13, 2023 aṭang khan hawn niin, October ni 20, 2023 thleng khian hun hawn a ni dawn a. Public holiday tih lohvah chuan zing dar 11 leh tlai dar 3 inkar chhungin assembly bial returning officer emaw, assistant returning officer emawte hnenah hming hi pek luh theih a ni a. Hming pek luhte hi October ni 21, 2023 (Inrinni) chawhma dar 11:00-ah endik a ni ang.