No.4423/2020-2021 

Vawiin chawhma khan I&PR Conference Hall, Kolasibah Returning Officer leh Sector Magistrate te tan training buatsaih a ni a, Dr H Lalthlangliana, District Election Officer chuan Training hawnna hun a hmanpui a ni.

Dr H Lalthlangliana chuan,”Sector Magistrate leh Returning Officer te chu Village Council inthlan lo awm turah hian Inthlanna felfai kenkawh kawnga an mawhphurna piah lamah Covid-19 hri do kawngah mawhphurna pawimawh tak an nei tel a ni,” a ti a, heng mawhphurnate hi phurrit a ngai lo turin leh Sawrkarin rintlak a a ngaih vang zawk a mawhphurna pawimawh tak pek an nih thu sawiin, phur tak a mahni chanvo theuh hlenchhuak turin a chah bawk a ni. District Election Officer chuan Village Council inthlanna chu Kohhran leh YMA-te nen tangkawpa, thianghlim leh felfai tak a kalpui tum a nih thu a tarlang a, inthlan ni a Polling booth bul a mahni serial number zawng a vote thlak tur pung khawm a awm loh nan voter serial number hi entheih tur a thawn chhuah vek tawh a nih thu a sawi bawk a ni.

Vawiin training-na hun hi Pu Vanlalchhuanawma Chawngthu, Election Officer in a kaihhruai a, Pu Nieng Thianlala, BDO, Bilkhawthlirin Inthlan ni a inkaihhruaina hrang hrangte leh vote chhiar dan chungchangah zirtirna a pe a ni. Traning ah hian Sector Magistrate 11 leh Returning Officer 56 te an tel a ni.

Kolasib district-ah hian Voter 60,634 awmin mipa 29,435 leh hmeichhia 31,199 an awm a, Village Council 56 a awm a ni. Hortokiah vote nei tam berin voter 2777 an awm a, Saihapui V ah voter 171 awmin in 16 a awm a, vote tlemna ber a ni.