No.4456/2020-2021
Vawiin chawhnu khan Dr H Lalthlangliana, District Election Officer, Kolasib chuan a pisaah thutharlakhawmtute kawmin Village Council Inthlanna neih dan tur chungchang a ruahmanna hrang hrangte a sawipui.
Dr H Lalthlangliana chuan ,”Village Council Inthlannaah hian ni 27.08.2020, zing dar 7 atanga tlai dar 5 thleng vote thlak theih a ni dawn a, Vote tlate hi Village Council hrang hrang a Counting Hall-ah zan dar 7 atangin a ruala chhiar tan a ni ang a, inthlan result hi Returning Officer-ten Vote chhiarna hmun ah an puang nghal ang,” a ti.
Kolasib Village Council inthlanna neih turah hian Covid-19 hrileng lak a invenhimna ngawrh taka kalpui tum a nih thu sawiin Vote thlaknaah hian Election Official Team-te leh Sawrkar mi pawimawh bakah, Chanchinbumi phalna neite bak, mipui awmkhawm a remchan dawn loh thu Dr H Lalthlangliana chuan a sawi a,”Kum dang a Voter Serial Number lehkha them a inpek thin pawh ti tawh lovin Vote thlak tur ten mahni Serial Number lo hre lawk vek tur a chah an ni,” a ti.
Vote thlakna a kal zawng zawng ten hmui/hmai tuam a, meter 2 vel a inkarhlat a dinga intlar tur a ni a, Vote thlakna (Polling Booth) luh dawnin kut silfai hmasak vek tur a ni bawk.
Vote nei thei tupawhin zalen tak a Vote an thlak theih nan indanbeh emaw inkhungbeh phal a ni lova, hrileng vanga invenna thil a in lama tawmim tur a tih te pawhin uluk taka hmui/hmai tuam chungin, midang pawh buai lova Vote thlak tur a tih an ni. Inthlan boruak muanawm leh felfai neih theih nan mitin zu leh ruihtheihthil dangah inthiarfihlim tur a tih an ni a. Zu leh ruihtheihthil avanga dan anga man te chu Vote an thlak thei lo emaw, vote thlak phalsak an nih lo emaw a nih loh pawhin anmahni mawhphurhna a ni ang.
Inthlan Result hi Returning Officer-ten aurinna hmangin mipuite hriat theih turin puan a ni dawn a, mipuite mahni In chhuahsan lova aurinna hmang a result puante ngaichang tur a tih a ni.
Inthlang tur mahni a Inthlanna hmun kal thleng theilo, ramtuileilo leh damlote chu Mizoram People’s Forum Local Unit ten an kalna an ngaihtuahsak thin dawn a, Political party ten Vote thlak turin phurh phal a ni dawn lo. Inthlanna felfai leh thianghlim Covid-19 hrileng inkaidarhna lak a him si kan neih theih nan MPF-te leh VLTF mawhphurhna la mektu Y.M.A te thahnemngai taka thawk tur a sawm an ni a, hma an lak mekna chungah D.E.O. Kolasib chuan lawmthu a sawi bawk a ni.
Tun tum Village Council Election ah hian Kolasib District chhungah Voter 60,666 an awm a, mipa 29,451 leh hmeichhia 31,215 te an awm a ni. Village Council 56 an awm a, Village Council Voter tamna ber chu Hortoki Village Council niin Voter 2,777 awm in, Voter tlemna ber Sahapui(V)-ah 171 an awm thung a ni.
Kolasib District chhung a Village Council 56 ah VC Seat 278 a awm a, hemi zing a 208 chu General Seat an ni a, a dang 70 chu hmeichhe tan bik a Seat a ni. Village Council Member 7 awmnaah General 5 leh Reserved 2, Member 5 awmnaah General 4 leh Reserved 1, Member 3 awmnaah General 2 leh Reserved 1 zel an awm a ni. Village Council Seat 278 inchuh tur ah hian Candidate 883 an awm a, an zing a 664 chu General Seat chuhtu an ni a, a dang 219 chu Reserved Seat (hmeichhe tana Reserved) chuhtu an ni.
Candidate 883 awm zingah Mizo National Front (MNF) in Seat awm zawng zawng 278 atangin 276 an chuh a, Indian National Congress (INC) in Seat 265, Zoram People’s Movement (ZPM) in Seat 179, Bharatya Janata Party (BJP) in Seat 24, National People’s Party (NPP) in Seat 2 leh Hmar People’s Convention in Seat 2 an chuh a, anni bak ah hian Independent in Seat 135 an chuh bawk a ni.
