Kolasib District chhunga Faina Hapta 2010 hman dan tur ngaihtuahin vawiin khan District Bawrhsap Pu R. Liankma hovin a office chamber-ah District Level Committee an thukhawm a. Faina Hapta chu 2nd October ah a hawnna neih tura relin DC in Kolasib Venglai Bazar hmuna Mahatma Gandhi lim awmnaah hei hi a hawng dawn a ni

Kumin Faina Hapta chu Kolasib khaw chhung V/C tinah leh Sub Town ah te District Sanitation Officer ruahmanna in kum dang zawng aia nasa leh uara hman turin Committee chuan an rel a. Pawisa pawh a tul anga semzai a, hnatlang senso tur leh bawlhhlawh paihna senso pawh ruahman turin an rel a ni. Vengtinah V/C te theuh remchan dan anga hnatlangpui chu neih tur a ni ang a, kum danga tih thin angin thil chi hrang hrangah fai endik a ni lo ang a. Veng fai pathum thlanchhuah te hnenah chauh lawmman pek a ni ang. V/C tin ten an vengchhunga School leh Office leh Restaurant te, Vantlang hmunte pawh tihfai hna chu a tul angin an hma tel vek dawn a ni.

Faina Hapta chhung hian District Magistrate te, Police hotute leh LAD/Town Sanitation lam ten veng tinte fangin ran chhah khap chungchang Dan an lekkawh tha em tih leh kawngpui a fai em, sorkar dan dinglai zah lova kawngpui dala bungraw chheh a awm em tih te an endik dawn a ni.

Faina Hapta hi 8th October 2010 ah DC Conference ah khar tura ruahman a ni.