2921/2025-2026

Kolasib, the 15th January, 2025 : Sawrkar Laipui ruahmanna angin vawiin khan Mizoram District hmun hrang hrang rualin Kolasib District-ah pawh Lirnghing thlen thulha chetlak dan tur nunchan, 'Mock Exercise ' hlawhtling taka neih a ni.

He Mock Exercise hi zing dar 10:00 khan tan niin, Lirnghing hi Champhai Hmar lamah Magnitude 7.1-a na a thleng anga chan a ni a. Kolasib District chhungah hmun hnih - District Education Office, Project Veng leh Khuangpuilamah te chhiatna thleng anga chan a ni. DC Conference Hall chu Emergency Operation Centre (Control Room) atan hman a ni a, Incident Commander Pi B. Malsawmtluangi, Addl. DC hovin Incident Response Team ten an vil a ni. Staging Area Manager Pu Lalnunfela'n briefing a neih hnuah rescue team te chu an duty na tur hmun theuh panin an chhuak nghal a ni.

Chhanchhuah hna (Rescue operation) hi uluk taka neih niin, District chhunga QRT, Police, 1st IR Mualvum, SDRF (Assam) , CRPF leh tlawmngai pawl hrang hrang te bakah Medical team te an thawkho a. Hliam tuar leh chhiatna tawk lemchang te hi rang takin Ambulance hmangin Hospital panpui thin an ni a, Doctor leh staff ten lo enkawl nghalin hmanraw tangkai - JCB, Morgue Van, Medical Aid Kit, Rope Rescue Equipment, Stretcher leh Tent-te hman a ni.

Vawiin zing lama nunchan neihnaah hian DEO Office-ah mi 20 hliam tuar anga chan niin, mi 7 Hospital panpui an ni a, mi 2 in nunna chan anga tihlan a ni. Khuangpuilamah Bus Accident lem chan niin, mi 11 in hliam an tuar a, mi 2 Hospital panpui niin mi 1 in nunna a chan bawk.

Tlai lam dar 5:00 hian Night Mock Drill neih chhunzawm leh tura ruahman a ni a. Hemi atan hian Medical team, SDRF team, F&ES team, CRPF, SDRF (Assam) leh QRT te chu tlai dar 4:40-ah Staging Area (DC Office) thleng kim tura tih an ni. Zan lam nunchan hi Venglai Bazar-ah neih tur niin, Zing leh zan lam Relief Camp atan hian Taitesena Hall, Venglai chu hman a ni bawk.