2935/2023-2024

2023 Pawltlak thla ni 4: November ni 7, 2023-a Mizoram Legislative Assembly Inthlanpui, 2023 buatsaiha Kolasib District chhunga assembly bial pathuma vote tlate chu vawiin khan Government Kolasib  College-a counting hall pathumah zing dar 8:00 aṭangin chhiar ṭan a ni a, tluang takin chhiar zawh a ni.

Counting Hall tinah hian vote chhiar hi Returning Officer-te leh Assistant Returning Officer-te'n ṭhut chilhin, Election Commission of India (ECI)-in vote chhiar dan endik leh vil tura a ruat Counting Observer pakhat ṭheuhvin an ṭhut chilh bawk a. Tuirial biala polling station 26 awma vote tlate chu dawhkan 9-ah round 3-ah chhiar a ni a; Kolasib biala polling station 29 awma vote tlate chu dawhkan 10-ah round 3-ah chhiar niin, polling station 34 awmna Serlui bialah chuan dawhkan 12-ah round 3-a chhiar a ni thung a. Postal ballot chhiarna leh VVPAT chhiarna dawhkan hun ni bawkin, dawhkan tinah hian vote chhiartu Counting Supervisor 1 leh Counting Assistant 1 bakah, vote chhiar viltu Micro Observer 1 ṭheuh an duty a ni.

Kolasib District chhunga assembly bial pathuma MLA Inthlanpui 2023 result tlangpui chu heti ang hi a ni:

4-Tuirial (ST) Assembly Constituency-ah hian vote 18,366 awmin, Electronic Voting Machine (EVM)-ah vote 15,493 leh Postal Ballot vote 367, a zavaiin vote 15,860 a tla a. Rejected vote 4 leh invalid vote 1 awmin, tendered vote a awm lo thung a. NOTA-ah vote 72 tlain, candidate-te vote hmuh zawng hi vote 15,783 a ni.

5-Kolasib (ST) Assembly Constituency-ah hian vote 23,970 awmin, EVM-ah vote 19,161 leh Postal Ballot vote 538, a zavaiin vote 19,699 a tla a. Rejected vote 3 leh invalid vote 3 awmin, tendered vote a awm lo thung a. NOTA-ah vote 112 tlain, candidate-te vote hmuh zawng hi vote 19,581 a ni.

6-Serlui (ST) Assembly Constituency-ah hian vote 21,120 awmin, EVM-ah vote 17,983 leh Postal Ballot vote 248, a zavaiin vote 18,231 a tla a. Rejected vote 6 leh invalid vote 1 awmin, tendered vote a awm lo thung a. NOTA-ah vote 52 tlain, candidate-te vote hmuh zawng hi vote 18,172 a ni.

Kolasib District chhunga bial pathum aṭanga thlan tlinte hnenah hian bialtu Returning Officer ṭheuhte’n thlan tlin an nihna certificate an hlan nghal a. 5-Kolasib bial aṭanga thlan tlin Pu Lalfamkima, ZPM chuan Returning Officer Pu John LT Sanga hnen aṭangin certificate hi dawngin, 4-Tuirial bial aṭanga thlan tlin Pu K. Laldawngliana, MNF leh 6-Serlui bial aṭanga thlan tlin Pu Lalrinsanga Ralte, MNF te erawh chu an awm remchan loh avangin an agent te’n an dawnsak a ni.

Vote chhiar zawh a nih hnu hian EVM leh election paper te chu sipaite venhimna hnuaia awm turin political party ai awhte hmuh laiin strong room-ah dah luh a, chhinchhiahna (seal) nena kalh hnan leh nghal a ni.

MLA Inthlanpui 2023 buatsaih zawh taka Kolasib District chhunga vote thlak leh vote chhiarnaa tha thawhtu official-te, tlawmngai pawlte, kohhrante, journalist-te, political party-te leh District mipui zawng zawngte thawhpuinaah Kolasib District Election Officer Pu John LT Sanga chuan lawm thu a sawi a ni.

(Result kimchang chu a hnuaiah hian dah a ni.)

MLA 2023 4-Tuirial AC (PS (wise) Results.pdf

MLA 2023 5-Kolasib AC (PS wise) Results.pdf

MLA 2023 6-Serlui AC (PS wise) Results.pdf

MLA 2023 Kolasib District (AC wise) Results.pdf