432/2024-2025
Kolasib dated 8th May, 2024: Vawiin khan DC Conference Hall, Kolasibah District AIDS Prevention & Control Committee chuan thutkhawmna neiin Kolasib district-a HIV darh zel tur ven dan te, HIV kai awlsam thei dinhmun a awm mek te enkawl dan tur leh zirna in hrang hrang a HIV lak a inven dan uar zawk a kalpui dan tur relin a ni. Pu John LT Sanga, Deputy Commissioner chuan thutkhawmna hi kaihruaiin Dr RK Lalthlamuana, Sr. CMO chuan Kolasib district HIV dinhmun tarlanna hun a hmang a ni.
Pu John LT Sanga, Deputy Commissioner chuan insumtheihna leh fimkhurna hmang a hneh theih natna do tur a ralthuam tha ber chu a hun tak a inzirtirna tha inpek a nih thu sawiin zirtirna tha hmang a Kolasib district hneh tak a tuam tur chuan Sawrkar, khawtlang, kohhran leh tlawmngai pawl te thawhho a pawimawh thu a sawi. Hmalakna sawt zawk kalpui tur chuan kan district chhung a HIV hrik kai zat leh an kai dan chiang zawk a hriat a tul thu Deputy Commissioner chuan sawiin chumi tur chuan mipui nawlpui ban phak turin HIV test-na hmun siam a pawimawh thu a sawi bawk a ni.
Pi Zuiliani Hrahsel, Joint Director (IEC), Mizoram chuan ‘Intensive HIV/AIDS Awareness Campaign in Rural Areas’ tih thupui hmangin Powerpoint Presentation-a pe a. Kolasib district chhung khaw hrang hrang a ‘Awareness Campaign’ kalpui dan tur te, khaw chhung hmun lun lai a zirtirna keng thu ziak tar chhuah dan tur te, Zirna in hrang hrang a ‘Awareness Campaign’ kalpui dan tur a tarlang a. District Community Resource Group din dan tur leh an hnathawh dan tur te bak ah Adolescence Education Program kalpui dan turte sawi ho a ni.
Dr. R K Lalthlamuana, Sr. CMO tarlan danin Kolasib district-ah hian June 2002 atang a March 2024 thleng khan thisen 95534 endik tawh atangin 1859 chu HIV positive tih hmuhchhuah a ni a, hei hi za zelah 1.94 ang a ni. April 2023 atanga March 2024 inkar a thisen endik chu 5578 a ni a, mi 104 HIV positive niin ART enkawlna pek an ni. HIV positive vei hmuhchhuah zingah kum 25 – 34 an tam ber a ni.
Attachment
- Loading attachment...
