DRDA, Kolasib hnuaia kum 2011- 2012 chhunga BNRGSK building sa tha ber be rte leh an khawtlang tih hmasawnna atana Material Component Rs 3,00,000/- ( Cheng nuai thum) hmang tha ber Village Council te hnenah vawiin khan lawman hlan a ni a, he inelna hi a tum khatna leh a hmasa ber a ni.

Kolasib DC Conference Hall-ah lawman hlanna inkhawm hi neih a ni a. Pi Maria CT. Zuali, Project Director, DRDA chuan tun tuma VC te puala inelna buatsaih chu sawrkar duhdan anga ram tana rotling bungrua (asset) siam a nih theih nana tih a ni, a ti a. District chhunga VC hrang hrang tena an hnathawh chu lungawi thlak thawkhat hlea a hriat thu sawiin an thawh leh zel turah pawh phurna petu a nih ngei a rin thu a sawi. Pi Maria-i chuan Kolasib District chhungah MGNREGS a thara endika kalpui a ni chu keimahni mipuite hmakhaw thatna tur liau liau a ni a, a thiltum bulfuk kan chhut loh avang leh mi rethei nitin khawsakna-a tlabal, engemaw-a inhumhimna leh tlukluhna (Security) nei ve lote dawmkanna tur atana duan a nih miau avangin sawrkar hnathawk leh dinhmun ngelnghet tena zen pui chi loh a ni, a ti a. Mizoramah sawrkar hnathawkte hlawh atana State pum budget zatve lai a kalral laiin thla bi hlawh nei velote dawmkan nana duan he scheme hi a nihna tur taka kan hman a tul a ni, a ti a ni.

Pi Anne Lalhriatpuii, Account Officer, DRDA –in lawmman hlanna inkhawm hi a kaihruai a. Addl. DC Pu Zairemmawia’n lawman tehi a sem a ni.

Thingdawl RD Block leh leh Bilkhawthlir RD Block chhunga VC zawng zawngte hnathawh hi endik tura ruat judge ten pawl hniha inthenin tehfung chi hrang hrang – mipui vantlang tan a chhawrnahawm em, an sum sen nen a inmil em, thawh theih bithliah chhung ami a ni em tihte an endik a, chuta a tha zual thlan chhuahte chu Judge 4 dangin an ennawn leh hnuah 1-na atanga 3-na thlan chhuah an nita a ni.

Lawmman 1-na latu Bilkhawthlir North-in Rs 1,50,000/-, trophy leh Certificate an dawng a. Lawmman 2-na latu Vairengte II in Rs 1,00,000/- , trophy leh Certificate, 3- na Zanlawn –in Rs 75,000/- trophy leh Certificate an dawng a ni. College veng,Kolasib, Lungdai leh Bualpui ten Consolation prize Rs 5,000/an dawng a. Vairengte II leh Lungdai te chu an hna a lungawithlak tiin Project Director chuan Special Prize Rs 10,000/- a hlan bawk a ni.