No.589/2021-2022

Kolasib dated 19th May 2021: Vawiin chawhnu khan DC Conference Hall-ah Kolasib district tan Chief Minister Relief Fund atanga cheng Nuai 5 ruahman tangkai tak a hman a nih theih dan tur chungchang rel in thutkhawmna neih a ni a. Dr.H.Lalthlangliana, Deputy Commissioner-in hun kaihruaiin Kolasib district a tlawmngai pawl hrang hrang hruaitute leh sawrkar-a thuneitute an tel bawk a ni.

Thutkhawmnaah hian Kolasib District chhunga Quarantine Centre-a awm, harsa zualte tanpui nan cheng 50,000 dah ni se tih rel a ni a, khaw tin VLTF kaltlangin Covid-19 hrileng avanga mi harsa zual, hna thawk thei lova inkhung hran ngaite leh inkharkhipna avanga eizawnna kawng a harsatna tawk mekte dap chhuah a, May ni 30, 2021 hma ngei a DC Office, Kolasiba an hming theh luh ni se tih rel a ni bawk. 

Hrileng avanga inkhuarkhirhna hrang hrang kalpuinaah hian Dr.H.Lalthlangliana chuan khawtlang a chhiat ni leh that ni a awm changin, inthliarna awm lova, rualkhai tak a inbuatsaihna te kalpui a nih theih nan NGO hruaitu kalkhawm te chu a chah. Inkhunghranna hun hmang mek, test hman loh emaw test result hriat hmaa boral an awm palhin, Sawrkar SOP angin Covid-19 positive patient ruang anga sawngbawl tur a nih thu a sawi a. Thlan laihnaah leh mitthi vuinaa thlalakna kalpui dan thin chungchanga fimkhur zual a ngaih thute sawiho a ni bawk a ni.

DC chuan Jordan Home, Sethawn CCC chu tangkai tak a hman mek a nih thu tarlangin Kolasib district chhung a Covid-19 positive te pawh inlam a inenkawl ngai lovin Sethawnah mi engemaw zah dah belh theih a la nih thu a sawi a. Covid-19 avanga boral an awm palh pawhin a thlahna leh vuina kawngah tute tan pawh rilru na a siam lova hun buatsaih thiam a tul thu a sawi bawk a ni.