2728/2023-2024

2023 Sahmulphah thla ni 7: Mizoram Legislative Assembly Inthlanpui, 2023 buatsaihah Kolasib District chhunga assembly constituency pathum - 4-Tuirial, 5-Kolasib leh 6-Serlui biala polling station 89-ahte tukin, November ni 7, 2023 (Thawhlehni) zing dar 7:00 aṭanga ṭanin, tluang takin vote thlak mek a ni.

Polling station tinah Electronic Voting Machine (EVM) khawl ṭhat leh ṭhat loh enchhin nana mock poll neih hmasak a nih hnuah zing dar 7-ah MLA Inthlanpui vote thlak hi ṭan a ni a. Tlai dar 3:00 thleng khan a pum puiah vote 46,204 tla tawhin, hei hi vote awm zawng zawng 63,456 aṭangin 72.81% a ni a. Postal ballot vote dawn tawh 975 nen belh khawmin, vote 47,179 (74.35%) tla tawh ang a ni.

Kolasib District Election Officer, 5-Kolasib (ST) Assembly Constituency-a Returning Officer ni bawk Pu John LT Sanga chuan inthlan kalpui dan enfiahin Kolasib bial chhunga polling station hrang hrang a tlawh kual a. Polling station dangdai bik (unique polling station) atana voter-te hip thei tura ngaw leh nungcha lam hawi (forest theme)-a chei 5/26-Saidan (Kolasib) Polling Station te, hmeichhe hlang duty-na (all women managed) polling station-te leh model polling station-te pawh a tlawh zingah hian a tel.

Kumin MLA Inthlanpui 2023-ah hian Kolasib District-ah model polling station pahnih ruahman niin, Kolasib Project Venga Government Kolasib High School-ah vote thlakna polling booth siam a ni a. Model Polling station pahnih zinga pakhat zawk 5/16-Project Veng Polling Station chu hmeichhe hlang duty-na niin, a pakhat zawk 5/28-Project Veng-II Polling Station chu polling station pangngai a ni thung.

He'ng model polling station-te hi intlar ngai lo (queueless) tura ruahman niin, District Election Office leh Project Veng Branch YMA te nen ṭang tlanga hma lak a ni a. Polling station-ah hian Voter Assistance Booth siam niin, a ṭul apianga tlawmngaia lo puibawm turin YMA member-te leh MPF te an duty a. Duty-te hian Mizo hnam thuam (traditional dress) inbelin, vote thlak tura kalte a ṭul angin an lo ṭanpui a. He'ng polling station-a vote thlak turte hi a chhungkua zelin an kal hun tur hunbi (time slot), darkar chanve bi ang zela ruahmanin, hrilh lawk vek an ni a; vote thlak tura hun tam tak khawh ral leh intlar ngai lovin voter-te chuan mahni vote thlak hun zelah polling station an pan thei hlawm a ni.

Model polling station-a vote thlak tura kalte tan hian polling station pawnah chawlh hahdamna tur chawlhbuk buatsaih niin, thlalak theihna tur photo booth te nen polling station hi chei a ni a. Polling station chhungah pawh kum upa leh vohbikte tana chawlh hahdamna tur pindan ruahman a ni bawk a. He pindanah hian smart TV chhawp niin, vote thlak chungchang inzirtirna hrang hrang tar lan reng a ni bawk.

Intlar ngaih lohna (queueless) polling station hi kum 2018 MLA Inthlanpuiah pawh khan Kolasib Project Vengah bawk hian kalpui a lo ni tawh a. Inthlan buaipuitute leh vote thlak tur mipuite tan a remchangin, inthlan kalpui dan pawhin a felfai phah hle a ni.