Kolasib District chhunga Sportsperson 17, discipline hrang hranga tithate hnenah vawiin khan Transport Minister Pu PC Zoramsangliana chuan Incentive Cash Award a hlan.

AMFU Hall, Project Veng, Kolasib-ah Incentive Cash Award hi sem a ni a. Thu sawiin Pu Zoramsangliana chuan infiammi hlawhtlinna duhawm tak tak neite chu a lawmpui takzet tih a sawi a. Tun hmain Sports Minister ka lo ni tawh a. Khatih hun laia kan suangtuahna kha tunah hian a tak a chang ta a ni, a ti a. Sports Minister Pu Zodintluanga hovin thalaite rualawhna phuhru turin nasa taka tan lak a niin tunah chuan artificial turf pawh hmun engemawzatah phah alo nita a ni, a ti. Infiammi te chu nun uluk tur leh nasa lehzuala bei sauh sauh turin a fuih a, a pawimawh ber chu insum theihna hi a ni fo, Pu Ramsanga chuan a ti a. Amah ngei pawh zuk leh hmuama lo buai ve tawh thin a ni tih sawiin chung chu Pathian chaknain a hneh a ni tih a sawi a. Kawng engkimah Pathian rawn chunga thil ti thin turin a chah a ni.

Award dawngtute chu Pathian malsawmna a ni tih hria a an pawisa dawn atanga sawma pakhat Pathian hnena an pek phawt chuan Pathian malsawmna an dawn belh ngei a rin thu pawh Minister chuan a sawi a ni. Award semna inkhawm hi Pu R. Buanthanga, DSYO, Kolasib in a kaihruai a. Pu Lalzirmawia Chhangte, MCS, Director, Sports & Youth Services chuan Department hmalakna leh award pek dan te a sawi a. Tun kum li kalta chhung khan mizote sports lamah kan CM zahawm tak tanlakna leh Sports Minister viak tha tak kan neih avang tein hma kan sawn nasa hle a ni, a ti.

Vawiina Incentive cash award dawngtute hi Kolasib District chhunga Sports discipline hrang 6- a titha mi 17 an ni a. Discipline hran dan leh an Medal lak a zirin an pawisa dawn zat hi a in ang lova. A zavaiin Rs 1,11,000/- vawiin hian sem a ni a. Hengte hi 2010- 2011 chhunga tithate an ni. Incentive Cash Award hi 2001 atang khan Mizoram sawrkar chuan alo sem tawh a. Tun thlengin hetiang Award hi infiammi 2269 laiin anlo dawng tawh a ni.