2758/2023-2024

2023 Sahmulphah thla ni 8: Mizoram Legislative Assembly Inthlanpui, 2023 buatsaihah November ni 7, 2023 (Thawhlehni) khan Kolasib District chhunga assembly constituency pathum - 4-Tuirial (ST), 5-Kolasib (ST) leh 6-Serlui (ST) biala polling station 89-ahte tluang takin vote thlak zawh fel a ni a. Kolasib District-a vote awm thei zawng zawng 63,456 (mipa 30,595 leh hmeichhia 32,861) aṭangin vote thlak nana hman Electoral Voting Machine (EVM)-ah vote 52,637 (mipa 24,954 leh hmeichhia 27,683) a tla a, 82.95% vote tla ang a ni.

Hriat theih chinah Kolasib District-ah postal ballot vote tla 975 a awm a. EVM vote tla leh postal ballot vote tla zat belh khawm hi 53,612 niin, hei hi vote awm thei zat (63,456) aṭangin 84.49% a ni.

Tuirial biala polling station 26-ah vote awm thei zawng zawng 18,366 (mipa 8,991 leh hmeichhia 9,375) aṭangin EVM-ah vote 15,493 (mipa 7,462 leh hmeichhia 8,031) tlain, 84.36% vote tla ang a ni a. Postal ballot vote 306 nen belh khawmin, vote 15,799 (86.02%) tla ang a ni.

Kolasib biala polling station 29-ah vote awm thei zawng zawng 23,970 (mipa 11,296 leh hmeichhia 12,674) aṭangin EVM-ah vote 19,161 (mipa 8,727 leh hmeichhia 10,434) tlain, 79.94% vote tla ang a ni a. Postal ballot vote 463 nen belh khawmin, vote 19,624 (81.87%) tla ang a ni.

Serlui biala polling station 34-ah vote awm thei zawng zawng 21,120 (mipa 10,308 leh hmeichhia 10,812) aṭangin EVM-ah vote 17,983 (mipa 8,765 leh hmeichhia 9,218) tlain, vote 85.15% tla ang a ni a. Postal ballot vote 206 nen belh khawmin, vote 18,189 (86.12%) tla ang a ni.

Kolasib District chhunga polling station 89 awm zingah 6/25-N. Thinglian Polling Station-ah vote awm zawng zawng 254 aṭangin vote 237 (93.31%) tlain, vote tlak ṭhatna ber polling station a ni a. 4/10-Mualvum Polling Station-ah vote awm zawng zawng 566 aṭangin vote 301 (53.18%) tlain, vote tlak chhiatna ber a ni thung a. Vote tla zat a tlem chhan hi 1st IR Bn sipai eng emaw zat election duty-a chhuakte’n postal ballot hmanga vote an thlak vang a ni a. Postal ballot vote nena belh khawm chuan hei ai hian a la sang leh dawn a ni.

Tuirial bialah 4/9-Lungmuat Polling Station chu vote tlak ṭhatna ber niin, voter 529 aṭangin mi 482-in vote an thlak a, vote tla hi 91.12% a ni a. Vote tlak chhiatna ber chu 4/10-Mualvum Polling Station a ni thung.

Kolasib bialah 5/6-Pangbalkawn Polling Station chu vote tlak ṭhatna ber niin, vote 578 awmah vote 517 (89.45%) a tla a. Vote tlak chhiatna ber 5/18-Venglai-II Polling Station-ah chuan vote 818 aṭangin vote 591 (72.25%) a tla thung.

Serlui bialah 93.31% vote tlakna 6/25-N. Thinglian Polling Station chu vote tlak ṭhatna ber a ni a. Vote 1,074 awma vote 859 (79.98%) a tlakna 6/30-Rengtekawn Polling Station chu vote tlak chhiatna ber a ni thung.

Polling station-a vote thlak zingah hriat theih chinah kum 101 mi Pu Rokanga, 4/26-N. Chaltlang-II Polling Station chu upa berin, kum 96 mi Pi Mankungi, 4/13-Kawnpui-III chu hmeichhe zingah a upa ber thung.

Kolasib District Election Officer Pu John LT Sanga chuan Pathian kaihhruainaa Kolasib District-a inthlan felfai, thianghlim leh muanawm tak a awm thei chu lawmawm a tih thu a sawi a. Inthlan buatsaihna kawnga District election official-te thawhpuitu sawrkar official-te, tlawmngai pawl, MPF, media, zirlaite, mimal leh political party te chungah lawm thu sawiin, inthlan hlawhtling tak a awm theih nana ṭhahnem ngai taka vote thlaktu District mipui zawng zawng chungah lawm thu a sawi bawk.

Kolasib District huam chhunga assembly bial pathuma polling station 89-a vote tlak dan kimchang chu heti ang hi a ni.