No.1158/2021-2022

Kolasib dated 28th June 2021: Vawiin chawhma khan DC Conference Hall, Kolasibah sawrkar hnuaia scheme hrang hrang Bank nena tangkawpa kalpui dan tur leh loneitute leh eizawnna hrang hrang bul tanna leh chhunzawm nana kum 2021-22 chhung a pawisa pekchhuah dan tur relin District Consultative Committee/District Level Review Committee-te chuan thutkhawmna an nei a. Dr.H.Lalthlangliana, Deputy Commissioner-in he hun hi kaihruaiin Kolasib district chhunga Bank leh Sawrkar Department hrang hrang hotute an tel a ni.

Dr.H.Lalthlangliana chuan Bank chu mipuite ban phak leh indawr tawnna hmun zalen leh nuam tak a siam chhunzawm zel turin Bank a thawktute a chah a, Bank dawrtute dawnsawnna kawng a inelna thianghlim nei thin turin a fuih bawk a ni. Hrileng karah eitur nei lo, hnathawk thei lo bawk a hri hmachhawn ai chuan eitur tlakchham awm lova hnathawk thei a mipui kan siam a ngai a ni, a ti a, hemi tur hian Bank-te chuan mi tam tak eizawnna bul tanna kawng a tanpuitu leh hrileng avanga eizawnna chhunzawm hleithei lote dawm kangtu hmanraw pawimawh tak an nih thu a sawi bawk a ni. Bank kaltlanga mipuite tan a hamthatna tam tak awm te chu a zau thei ang ber a inzirtirna kalpui turin Deputy Commissioner chuan kalkhawmte a chah a, hrileng kar a mi koh khawm a rem loh avangin Social media hmang tangkai thiam turin a chah. Dr.H.Lalthlangliana chuan Kolasib khaw chhung a ATM-ahte chuan Hand Sanitizer awm reng tur a nih thu a sawi a, ATM leh Bank-te chu venhimna hmanraw tha nen a tul ang a thawmthat a, vil reng a pawimawh thu a sawi bawk a ni.

Vawiin a Kolasib district DCC/DLRC/DLSC thutkhawm a Annual Action Plan 2021-22 pharh ah hian Kolasib district chhung a bank hrang hrangte chu Cheng nuai 12,873.69 sem chhuak tur a bituk an ni a. Heng zingah hian Agriculture leh a kaihhnawih a loan pekchhuah tur a bituk hi tam berin cheng nuai 5,794.99 a ni.

January - March 2021 kalta chhung khan Kolasib district chhung a Bank hrang hrangte sum dawn khawm atanga pekchhuah dan khaikhinna (Credit Deposit Ratio) khaikhawm chu 56.29% a ni a, PMMY hnuaia loan pek chhuah chu account 596 atangin 727 ah a pung a, Stand Up India scheme hnuaiah mi 8 hnenah loan pekchhuah a ni. Tun kum ah hian Self Help Group 313 te nen Bank hi inthlunzawm mekin khawsak harsa zual ( Economically Weaker Section) account 5,211 ah cheng nuai 8,609.60 sem chhuah a nih thu tarlan a ni.

Kolasib district chhung a bank hrang hrang ina loan a pekchhuak, thla 3 chuang rul tawh lo, Non Performing Account anga ngaih, Priority Sector hnuaiah 1,955 leh Non Priority Sector hnuaiah 210 a awm mek a ni. March 2021 thleng khan PMSBY dil thei account 55,213 awm zingah 10,558 ziah luh a ni a, PMJJBY dil thei 39,849 zingah 6,969 chiah diltu an awm bawk a ni. Mipuite hamthatna tur a duan scheme-te hi a zau thei ang ber a mipuite hnen a thlen theih nan inzirtirna uar zawk a kalpui ni se tih rel a ni bawk. Pu JD ?aite, District Development Officer, NABARD, Kolasib district chuan Pre Potential Linked Credit Plan 2022-23 sawi zauna hun a hmang bawk a ni.

Vawiin vek khan District Level Monitoring Committee for the Formation and Promotion of 10,000 Farmers Producer Organization, Kolasib district te chuan thutkhawmna neiin Kolasib district FPO atan Dragon Fruit-ah hmalakna kalpui ni se tih a rel a ni a, hemi chungchanga Kolasib district chhung a zir bingna nei tur hian Clover Organic Pvt.Ltd. te chuan hma an la dawn a ni. Sawrkar laipui hmalakna hnuai a FPO 10,000 din te hian an din kum atanga kum 3-na thleng cheng nuai 18 tanpuina an dawng thei a ni.