No.7241/2020-2021

Vawiin chawhnu khan DC Conference Hall, Kolasibah Dr.H.Lalthlangliana, District Election Officer chuan ni 1, January 2021 behchhan a Electoral Roll buatsaih a tlangzarh a, E-Roll tlangzarh thar ah hian voter za zelah 1.76-in an pung a ni.

Dr.H.Lalthlangliana, DEO chuan Electoral roll hlawhtling tak a tlangzarh a nih theih nana thawktu hrang hrangte inpekna chungah lawmthu sawiin, Sawrkar siamna kawnga kan chanvo, kan duhthlanna kan hman theuh theihna turin E-roll a kan hming chuan tir chu kan ngai pawimawh theuh tur a ni, a ti.

Electoral Roll tlangzarhna hi Pu. Vanlalchhuanawma Chawngthu, Election Officer-in a kaihruaia, Political Party hrang hrang aiawha lo kalte hnenah Electoral roll hi sem chhuah nghal niin Roll buatsaihna kalpui dan chungchangte sawi zauna hun neih a ni. ERO, AERO, Kolasib District Standing Committee, Political party aiawhte leh chanchinbumite E-roll tlangzarhna hunah hian an tel a ni.

Ni 1, January 2021 behchhan a Electoral roll buatsaih ah hian Kolasib district chhung a Assembly Contituency pathum awm a voter awm zat belhkhawm chu 60,879 a ni a, hmeichhia 31,306 leh mipa 29,573 an awm a ni. Kolasib (ST) AC ah voter 22,780, Serlui (ST) AC ah voter 20,194 leh Tuirial (ST)  AC ah 17,905 an awm a, mipa 1000 zel ah hmeichhia 1059 awm anga chhut niin Voter za zel a 30.35 te chu kum 20 leh 29 inkar an ni. E-Roll a ziah luh thar 1962 an awm a, roll atanga paih 907 awm bawkin Roll a hming ziah luh punna hi 1055 a ni a, za zelah 1.76 in voter punna hi chhinchhiah a ni.