Vawiin khan I&PR Conference Hall Kolasib ah  ‘Goods and Services Tax (GST)  E-Waybill (Electronic Waybill) chungchangah Kolasib District huamchhunga sumdawngte tan Taxation Department, Kolasib Zone chuan training a buatsaih.

Training kaihruaitu, Pu Lalthansanga, Deputy Commissioner of State Tax, Kolasib  Zone chuan, training pawimawhna leh sumdawngten sawrkar an thawhpui pawimawhna leh GST hlawhtlinna tur sumdawngte kutah a innghat a ni ati a, mipui nawlpui te pawn GST kan hriat chian a pawimawh thu a sawi a. Ram dan zawm that hi khua leh tui tha tih tur a ni thu sawi in, sawrkar sum thawh chhuah hi ram hmasawnna anih avangin sawmdawngte hi an pawimawh a, GST ah hian online vek a thil tih anih tawh avangin sumdawngte he lama an intahhriam chuan thil harsa lutuk a nilo va, an thiam chuan an mahni tan awlsamna thlentu ani zawk dawn a ni ati a. Tin, chhiah pek kawngah thahnemngai zel turin a fuih bawk a ni.

Pu Vanlalruata Ralte, State Tax Officer leh Pu KH Thanchhunga State Tax Officer ten E-Waybill chungchangah zirtirna an pe a. Pu Vanlalruat Ralte chuan, Powerpoint Presentation hmangin E-Waybill chungchang chipchiar takin training a pe a. E-Waybill siam tur chuan bungraw hralhtu (Consignor) leh phurtu (Transporter) leh leitu (Consignee) ten an siam theih thute leh E-Waybill siam tura Registration hrana tih a ngaih thu te pawh a sawi a. Tin, bungraw lei emaw hralh a kilometre 10 aia thui kalpui ten cheng 50,000/- (singnga) chunglamah E-Waybill siam ngei ngei a ngaih thu a sawi.

Chawhnu lamah sawihona, zawhna leh chhanna hun Pu KH Thanchhunga hova hman ani a. Vawiin training ah hian Kolasib District huamchhunga sumdawngte mi thahnem tak an tel a ni.