2550/2022-2023
Kolaisb dated 4th November 2022: Vawiin khan ni 4 awh, Kolasib Officers Club buatsaih, Inter-Office Sports 2022 kharna hun chu Kolasib Stadium, Project Vengah hman a ni a. Pu John LT Sanga, Deputy Commissioner chuan hun hmanpuiin DRDO & Allied, White Team te chuan inelna hrang hrang 18 atangin medal 11 lain pakhatna an ni a, DAO & Allied, Red team-te chuan pahnihna dinhmun an la bawk a ni.
Pu John LT Sanga chuan hnathawhna sawt zawk a kalpui tur chuan rilru leh taksa hrisel neih a tul thu leh thawhhona boruak tha siam thiam a pawimawh thu a sawi a. Kolasib district chhunga Office hrang hrangte inpawhtlanna tur leh thawhhona tha siamna tur a Kolasib Officers Club ten Inter-Office Sport an buatsaihna chuan rah tha tak a hrin chhuah ngei a beisei thu a sawi a. Mahni hna ngai pawimawh a, thawhhona boruak tha siamtu nih tum theuh turin leh mahni office theuh a mawhphurhna hrang hrangte ngai pawimawhtu sawrkar hnathawk nih tum theuh turin Inter-Office Sports-a tel te chu a chah bawk a ni.
Vawiin Inter-Office Sports 2022 kharna hun hi Pu ST Lalhmingmawia, President, KOC in kaihruaiin Pu Samuel Lalrinawma, Secretary, KOC chuan inelna hrang hrang kalpui dan tlangpui tarlanna hun a hmang a. Lawmman semchhuahna hun neih nghal bawk a ni. Inter-Office Sports 2022 hi ni 1, November atanga neih tan niin Kolasib district chhung a sawrkar pisa leh bank 78 a thawktute an tel a. Team 8 ah inthenin inelna chi hrang 18 hmangin sports hi neih a ni.
