4259/2023-2024

Kolasib dated 19th March 2024: Lok Sabha MP inthlanna kalpui tur a inbuatsaihna kal zel ah vawiin khan Kolasibah Media Certification & Monitoring Committee chuan thutkhawmna an nei a. Vote zawn nana Electronic Media hrang hrang hmansualna thleng thei ven kawng a ECI-in inkaihhruaina a siam te chu Pu Hmingthanzuala, DIPRO chuan sawi zauna hun a hmang a ni.

Media Certification & Monitoring Committee, Kolasib District chuan inthlan puan a nih atangin Electronic media, Social media tiamin, political advertisement awm dan an vil tan a. Electronic media kaltlang a Political advertisement chhuah tur te chu Election Model Code of Conduct an zawm leh zawm loh endik an nih hnu ah MCMC hian chhuah phalna a pe thin dawn a ni. Vote zawn nana Electronic media kaltlang a Political party emaw Candidate-te senso chu chhinchhiah a ni ang a, Account team-te hnen ah thawn thin a ni ang. Inthlan ni leh inthlan hma ni (Pre Poll) a chanchinbu kaltlang a Political advertisement chhuah tur te chuan MCMC atang hian phalna an lak hmasak a ngaih thu vawiin thutkhawmna ah hian tarlan a ni bawk.

MCMC, Kolasib district Chairman chu Pu John LT Sanga, District Election Officer a ni a, Pu Hmingthanzuala, DIPRO chu Member Secretary niin Pi Christina Lalmuanzuali, Election Officer, Dr. Blessa Sailo, Sr. Scientist, ICAR, Pu Lalnunmawia Kawlni, MJA leh Pu R.Lalhmingthanga, Editor, FOCUS Program-te chu member an ni.