No.2163/2021-2022
Aizawl dated 8th September 2021: Vawiin chawhma khan District Mission Director, Mizoram State Rural Livelihood Mission, Kolasib District hmalakna leh Azadi Ka Amrit Mahotsav hmanna pualin Kolasib district chhunga Self Help Group member 43-te hnenah Start-up Village Entrepreneurship Programme (SVEP) kaltlangin Community Enterprise Fund (CEF) semchhuahna hun, I&PR Conference Hall, Project Veng, Kolasibah neih a ni a. Dr.H.Lalthlangliana, Deputy Commissioner chu khuallian niin he hun hi a hmanpui a ni.
Khuallian Dr.H.Lalthlangliana chuan Kolasib district-a eizawnna kawnga hmasawn tum a nuho intelkhawm, Self Help Group-te chu hma an lo lak tawhna hrang hrangah titha ber pawl an nih a rin thu sawiin hemi kawnga thawktute chu fakawm a tih thu a sawi a, thawhhona leh tanrualna hnuaia hmalakna chu a sawtin a hlawk zawk fo thin thu a sawi bawk a ni.
Dr.H.Lalthlangliana chuan thawhhona tha awm tur chuan rinawmna vawn nun a pawimawh thu sawiin rinawm tlatna chuan malsawnna leh hmasawnna tam zawk a thlen thin thu a sawi a, pawl ang leh mimal anga an hmalaknaah pawh hmasawn tumna nghet tak nen rinawm tak a hma la turin CEF dawngtute chu a chah. DC, Kolasib chuan dawhtheihna leh teirei peihna nun nei tura fuihin Community Enterprise Fund chu tangkai taka hman a nih rualin, Loan a nih anga, a rulh let dan tur pawh ngai pawimawh bawk turin SHG member-te chu a chah nghal bawk a ni.
Pu Benjamin Lalzama, Project Director leh District Mission Director ni bawk chuan Kolasib district chhunga MzSRLM hnuaia khaw hrang hranga nuho eizawnna kawnga tihhmasawn hna an kalpui dan tarlangin Thingdawl RD Block-ah SHG 380 leh Bilkhawthlir RD Block-ah 345 an awm mek thu a sawi a. SHG bultan nan Rs.2,500 pek thin a nih thu te, thla thum an tlin hnuah Revolving Fund Rs.10,000-15,000 pek an nih leh bakah thla 6-an tlin hnuah member-ten an inpuk kual tawn atan Community Investment Fund, SHG pakhat tan Rs. 1,10,000 pek an nih thin thu a tarlang a. CEF chu loan a nih angin a peipun kawngah taima tak leh tih tak takna thinlungpu chunga tangkai tak a hmang turin a chah bawk a ni.
Pu T.H. Lalrokhawma, Block Program Manager chuan SVEP kalpui dan chungchang sawi zauna hun neiin Pi Lalrinzuali Varte, Block Mission Manager, Bilkhawthlir RD Block leh Pu Lalremtluanga, Livelihood Coordinator, Thingdawl RD Block-te chuan an bial chhunga hmalakna an kalpui dan tlangpui tarlanna hun an hmang.
CEF semna hun hman zawh hian Pu C.Zosangliana, DHO, Pu P.C. Lalvuana, Functional Manager, DIC, Dr. Michelle C.Lallawmkimi, Senior Scientist & Head, KVK leh Pu Isaac Lalfamkima Sailo, Branch Manager, MRB, Kolasibte hnen atangin CEF hman tangkai dan tur chungchanga thupui hrang hrangah zirtirna neih a ni bawk a ni.
Vawiin a SVEP hnuai a Community Enterprise Fund (CEF) mi 43 hnen a sem chhuah hi Rs.40,50,000/- a ni a, kumin vek hian Rs.51,30,000/- chu mi 53 hnenah pek chhuah a lo ni tawh a ni. CEF dawngtute zinga a tam zawk chuan Puan thui, chhang siam, eichawp dawr siam leh Furniture works lam a hma lak tumte an ni. Start-up Village Entreprenuership Programme hi Kolasib leh Serchhipah kalpui mek niin kum li (4) chhung kalpui tur a ni ang a, hemi chhung hian Kolasib district chhunga SHG member leh member-te chhungkaw zinga eizawnna chawikan sakna atana CEF pek tur 800 tinzawn niin, heng zinga 400 chu eizawnna bultan thar tur leh a dang 400-te chu eizawnna nei sa, tih changtlung lehzualna tur atan a kalpui tum a ni. SVEP hnuaiah hian skill development training chi hrang hrang kalpui mek a ni bawk a ni.
Attachment
- Loading attachment...
