Kolasib District tana ram leilung awmdan leh a hman tangkai dan tur ruahmanna, North Eastern District Resources Plan (NERDP) portal chu vawiin khan Kolasib DC Pu Jitender Yadav, IAS chuan DC Conference Hall-ah a mamawhtute hman thei turin a tlangzarh.
Kolasib DC Pu Jitender Yadav chuan Mizoram Remote Sensing Application Centre (MIRSAC) leh North Eastern Space Application Centre (NESAC) tangkawpin Kolasib District ram leilung awmdan hrang hrang tarlanna leh a hman tangkai theih dan ruahmanna an buatsaih hi a lawm awm hle a tih thu a sawi a. District inrelbawlna fel zawk leh Line Department-te tana Detailed Project Reoprts (DPR) felfai leh changtlung zawk siam theih nana puitu tur NERDP hi Department ten tangkai taka hmang turin a chah a ni.
NESAC, Shillong atanga mithiam lokal Pu Victor Saikhom chuan NERDP buatsaih a nih dan leh a hman tangkai dan tur presentation hmangin a zirtir a. MIRSAC mithiam leh he hun kaihruaitu Pu C. Vanlalengkima NERDP hi North Eastern Council (NEC) bultuma buatsaih a nih dan te sawiin Mizorama District pathum – Saiha, Serchhip leh Kolasib ah te tih hmasak a ni a, a tah tawlin District dang tan pawh la siam belh zel a ni ang, a ti.
He hunah hian MIRSAC mithiamte bakah Kolasib District chhunga line Department hrang hrang aiawhte an tel.
NERDP software hi Kolasib DC Office-ah bun a ni a, a hmang duh line Department te chuan an hmang thei dawn a, hei bakah hian hun reilo tea mipui lam te tan pawh hman theiin dah a ni dawn a ni.
Hetianga ram leilung awm dan leh a hman tangkaina hi Meghalaya-ah District awm zawng zawng 11 ah te chuan siam a lo nih tawh a. A hman tangkai theih kawng a tam tih hriaiin Ministry of DoNER chuan Hmarchhak District 25 ah te siam a remti a, a tah tawlin Hmarchhak District zawng zawng te tan siam beisei a ni.
